Tag 8: Galapagos - Genovesa Island

Ih de Nacht is Boot zu de andere Insle gfhare ih 6h. Es hett crazy gwelled und es isch gar nid ahgnehm gsi zum schlafe. D’Gfahr usem Bett z’gheie hett würklich bestande😂 Au de hütig Tag het früeh ahgfange. Am 6:00 hetts nämlich zmorge geh und am 7:00 simmer mit de Böötli (Dinghis) ahs Ufer vo de Insle gfahre. De Strand het James Bay gheisse und isch imene Caldera gsi, wo die einte wänd ihbroche sind, dass s‘Meer inecho isch. Also het Genovesa Island sozege d‘Form vonere Sichle gha. Ufm Strand hets überall Seeleue und gaaanz viel Vögel gha. Nacher simmer vom Strand us go Schnorchle. Langsam chanis Schnorchle gnüsse, au wenns amel recht schnell chalt wird. Grad drufabe hends üs mit de Böötli anen andere Ort ih dere Bay gfahre, wo mir bim Schnorchle Hammerhead-Skarks und de Galapagos-Shark gseh hend. Nachem Z‘Mittag hets en chliine Nap geh, bevor mir zum 3te Schnorchelgang gfahre sind. Det henmer Schildkrötli und Roche gseh. Denn simmer chli zu de Felserige Landschaft gfahre zum eh chlini Wanderig go mache und no meh Vögel z‘bestuune. Ufm Rückweg zum Boot isch grad d‘Sunne untergange und bi dem klare Himmel isches eifach wunderbari Stimmig gsi. Bim znacht hetts Sushi zur Vorspiis geh. Generell isch s‘esse uh fein. Ich als Vegi iss zwar vorallem nur Gmües, aber trotzdem seeehr fein. Nacher hends ufm Boot no gschnell d‘Liechter abgstellt, dass mer chönd de Sternehimmel bestuune. Vo Sternschnuppe zu Satellite, de Saturn, Jupiter hemmer würklich alles gseh. Üse Guide de Javier macht alles sehr guet und lustig! Was er alles weiss isch crazy. Am 9ni simmer wieder is Bett. Aber bi dem Wellegang wirds iihschlafe sicher nid so eifach…Read more