Ballesta Island - Paracas

De hütig Tag het wieder früeh für eus gstartet. Am 7ni hemmer ih eusem Hostel ih de Chuchi feine Avocado-Toast gmacht und gesse. Eusi Challenge isch jetzt da möglichst viel Avocados z‘esse bis sie eus verleided und mir dihei denn vlt sogar froh sind, mömmers nid wieder esse… am halbi 8i het eus euse Tourguide abgholt und mir sind uf Paracas gfahre. Det simmer den dur de halb Hafe grennt (Tourgides hends immer unglaublich pressant) und wo mer den 5mal üse Platz gwechslet hend, hemmer endlich dörfe ih es Boot stiige für eh chliini Bootstour zu de Ballesta Insle, au bekannt als „Galapagos für Armi“. Doch bis das Boot mal voll gsi isch, isches gfühlt 300 Jahr gange und all hend gfühlt 300mal müesse de Platz wechsle, bis es am Tourguide passt het. Chum simmer losgfahre scho hemmer no ide Strandbucht eh chlini Herde Delfine gseh. Sie sind uuh nöch ah eusem Boot gsi und mir hends mega guet gseh. Denn simmer is Meer gfahre zu de 3 Insle. Uf de einte hemmer villi Humboldt-Pinguine gseh uf de andere paar Seeleue und uf de letzte hets eh halbi Million Vögel gha. D‘Insle isch fasch schwarz gsi und d‘Vögel sind ih ihrne Formatione rundume gfloge. Das het sehr iihdrücklich usgseh. Ufere andere Insle hets au na so Linie im Bode gha. Ähnlich wie die bekannte Nazca-Linie. Da mir Nazca uslönd, werdemer die Linie nid chöne aber die chömed sicher no nöch dranane. Es sind eifach Linie wo‘d Inkas dazumal in Bode gstampft hend, Skulpturähnlich usgsehnd und bis jetzt erhalte bliibe sind. Womer mitem Boot zrugggfahre sind, hemmer sogar no en Chliiwal (Schnabelwal) gseh, wie er 2 mal isch cho Luft hole. Nacher simmer an Land no mitem Bus is Naturreservat Paracas gfahre. D‘Landschaft isch sejr ihdrücklich gsi. Eh Wüest grad nachem Meer. Am 3 simmer öppe zrugg im Hostel gsi. Mir hend denn chli glese und dusched und sind denn wieder is Städtli go Znacht (KFC) und Dessert (Waffle) stopfe bis mer am 8i wieder im Bett glegge sind. Mir hend denn die nögste Täg na buecht inklusive de Ihtritt für de Macchupicchu. Mir sind wiedermal extrem ghyped uf das wo no chunt🥳Read more