Pisco, Pisco und nomeh Pisco

Hüt hemmer versuecht uszschlafe, sind aber glich scho geg die 6i wach gsi. Am halbi 9ni simmer im Kaffi gegenüber (jaku coffee) en chalte Latte und en Avocadotoast go neh. Churz drufabe isch üs euse Tourguide go hole. Mir sind denn mitem Auto chli Usserhalb uf s‘älteste Wiiguet vo Peru gfahre, wo d‘Spanier dazumals erbaut hend. Während de Autofahrt dur‘d Wüest hemmer eus fasch nid chöne vorstelle, das irgendwo da söll Truube wachse. Doch glii simmer im Tacama Wiiguet ahcho. Mir hend denn eh chlini Füehrig becho, wie sie de Wii herstelled, wo sie in lagered und hend ufeme chliine Türmli en super Usblick über d‘Rebfelder gha. Nacher hetts es chliises Tasting geh. Mir hend zwei Wiiswii, ein Rotwii und ein Pisco pur dörfe probiere. D‘Wii sind maximal süess gsi, doch so hends d‘Südamerikaner gern. Sie düend sogar Stevia dezue, oder mängisch sogar richtige Zucker. Au hends nie würklich meh als 13% alkohol drin. So sind d‘Wii au umso süffiger gsi. De Pisco pur het 42% gha und isch würklich en Schnapps woni nid gern han. Scho liecht beschwippst hemmer es Glace gnoh und sind zum nögste Stopp gfahre. Es Pisco-Tasting. Mir hend im ganze sicher 10 so chlini Shots vo folgendem Pisco dörfe probiere:
- Pisco mit Orange und Zimt Aroma
- Pisco mit Fiige (min lieblings drum hani grad 2 becho)
- Pisco wie en Rotwii
- Pisco wie en Rosé
- Pisco Pur
- Pisco Crema mit Pfirsicharoma
- Pisco Crema mit Cacaoaroma
- Pisco Crema mit Lucumaaroma (peruanischi Frucht)
- Pisco Crema mit Chirimoyaaroma (wie Öpfel)
- Pisco Crema mir Kokosnussaroma
Nacher simmer mitere liechte Schiibe in Ica, s‘Städtli vor de Huacachina-Oase, abgsetzt worde. Mir hend denkt es isch eh gueti Idee zersch mal öppis go esse. Direkt am Plaza des Armes (das isch de Hauptplatz und eich jedi Stadt hett so eine mitere Chile dezue) simmer ines chliises Resti ghocked. Mir hend den beid sone Gmüestortilla bstellt, wo no fein gsi isch. Nacher simmer 2 Shoppingmall‘s go abchlappere bevor mer den es Tuctuc zrugg zu de Ose gno hend. Mir sind denn miteme Bier uf d‘Terrasse vo üsm Hostel ghocked und hend chli glese bis es Ziit für de Znacht gsi isch. Mir sind ersch geg die 8i gange, da mer am viertelab 11 wieder en Nachtbus hend und Ziit chli hend welle usezögere.Read more