Bequeme Stadttag

Hüt simmer biziite ufgwachet und im Eco Brunch go zmörgele. Es het natürlich wieder en Avocadotoast und eh Yoghurtbowl geh. Nacher simmer uf die 10ni ahne Free-Walking Tour. Eusi Guidin hett sich weg de Sunne so fest ihpackt (dezue no 2 Maske im Gsicht) das mir nie würklich Huut vo ihre gseh hend. Ersch als mer mal inere Chile gsi sind, hett sie ihri Kaputze und Hüettli und Maskene abzoge und drunter isch so eh herzigi jungi Frau gsi. Was sehr unterwartet cho isch, da mir die ganz ziit gmeint hend aue segi ca Ü50. Sie hett eus aber seehr viel spannendi Sache verzehlt und mir hend ganz viel neui Egge kenneglernt. Arequipa wird au als wiisi Stadt bezeichnet, will sehr viel Gebäude us dem wiise Tuffgestein (Vulkangestei nacheme Usbruch) erbaut worde sind. Geg die 12i isch die Tour fertig gsi und mir hend üs neumeds en Kaffi gholt. Denn simmer is Santa Catalina Kolster gange. Mittlerwiile chamer dete en Teil besichtige, obwohl immerno Nonne dete wohned, abkapsled vom Rest vo de Stadt. Es isch sehr ihdrücklich gsi, aber irgendwie au gruselig. Die ehemalige Zimmer vo de Nonne hends immer mit „Zelle“ ahgschriibe und über jedem Bett isch es Chrüz ghanged. Defür sind d‘Innehöf und Gässlu sehr farbig gsi mit Pflanze und es isch würklich chli wie es chliises Dörfli gsi. Nacher simmer no in andere Stadtteil Yanahuara gloffe zumene schöne Ussichtspunkt wo mer grad all 3 Vulkän umd Stadt gseh het. Geg de Abig simmer no imene vegetarische Restaurant Omphalos go Znacht esse und nacher na inere Bar en Pisco go trinke. Doch mkr sind den gli is Bett will morn mömmer sehr sehr früeh use…Baca selengkapnya