Weg vo Sucre, ab uf Potosí

Nachere guete Nacht simmer am halbi 9ni go zmörgele. Nacher simmer amene chliine Projektli nahgange, wo Jenny und ich scho sit afangs Reis als Idee hend und ez da in Sucre endlich hend chöne umsetzte. Drufabe simmer den imene Kaffi miteme Stuck Chueche und eme Iced Latte go druf ahstosse. Da mer am Namitag mitem Bus ma hend welle uf Potosí reise, hemmer nüm viel Ziit welle verlüüre und sind zrugg is Hostel. Denn simmer genau wieder uf de Marc gstosse. Er isch grad chli am verzwiifle gsi, will sin Heiflug vo Lima isch und er drum wieder glii uf Peru het welle. Da de Präsident ja mittlerwiile hinter Gitter isch, hends zumene Landesstreik ufgforderet und anderi Touris brichtet, dasses grad eh richtigi Katastrophe dete isch. Zum Glück hend mir nurna de Süde vor Auge. Mir sind natürlich gspanne, wo es ihn ez na aneverschlaht. Er hett üs versproche, er haltet eus ufm laufende. Mir sind den mitem Taxi ad Terminal und hend üs in Bus nach Potosí gsetzt. D‘Busfahrt isch ganz okeii gsi, länger als mir erwartet hend. Am halbi 9ni simmer mitm Taxi zum Hostel Los Faroles gfahre und ufem Weg hemmer scho gseh, das da in Potosí einiges meh los isch, also in Sucre. Mir hend eus den grad nochli uf Gass begeh und sind dur ein Wiehnachtsmärt gloffe, wo voller Christbaumchugle und LED-Liechter gsi isch. Wiiter obe hemmer namal en Platz gfunde wo fest gschmückt gsi isch und überall hetts glüüchtet. Mir sind denn grad chli in Wiehnachtsmärt-Vibe verfalle. Nacher zrugg im Hostel simmer schön go dusche und gnüssed sit langem wiedermal es eignigs Zimmer🙈Read more