Striptease River Trail

Dank Wärmepflaster, Schmerzmittel und Sämys Physio-Sohn-Händ isch de Martina ihre Hexeschuss scho zimli abklunge. Merci Säm :*
Hüt hemmer en stahlend schöne Summertag mit fascht 30 Grad gha, somit hemmer denkt machemer en schattigi Wald-Wanderig. Im Tsitsikamma National Park gits en Striptease River Trail, wohl so gnennt wel de Weg an 11 Badepools verbifüehrt. Die Pools hend zimli eindütigi Näme: Honeymoon Pool, Bikini Pool, Topless Pool, Boobs Pool etc. und nei, das sind nid vum Sämy vergebni Näme :) s Wasser in dene Pools isch wie scho in de Skeleton Gorge in Kapstadt rot verfärbt gsi (wege de Vegetation im Izugsgebiet) aber offebar isches sehr reins Wasser, womer au direkt so vum Bach chennti trinke. De Trail isch sehr interessant und scho teilwis nu aspruchsvoll gsi, über Stock und Stei, durch Gebüsch, Farne und anderene Dornegwächs. De Trail isch teilwis so zuegwachse gsi, asmer gar nüm recht gwüsst hend, wo mer selled laufe... En Teil vu dr Strecki lauft mer au im Flussbett und hüpft vu Stei zu Stei s Tal deruf.
Wels hüt so schön warm isch gsi hemmer eus au in zwei vu de iischalte Pools gwagt... Wer hätti dänkt as euse erschti Wasser-Badekontakt in Südafrika nid öppe im Ozean si würd, sondern imene rote Gebirgsbach :)
Hüt übernachtemer nu im Tsitsikamma NP, inere richtige Holzfäller-Blockhütte. Mer ghört d Brandig tose und im Resti gilts früschi Austere für 1CHF/Stk... am Sämy sis Paradies :) Föteli folged morn bi Tagesliecht.*Read more