Elephant and leopard day Pt.1

Nachem geschtrige Abig Drive hemmer dänkt es chäng nüm würkli besser cho... so simmer ganz entspannt am Morge am 6i zum Morning Drive gstarted und hend eigentlich nid vil erwarted. Am Afang hemmer Gnus, Giraffe, en Hyäne und paar Elefante und Büffel gseh, zudem en Geier-Familie ufeme Baumwipfel. Wieder hemmer nichtsahnend zum Zmorge-Kaffee Halt gmacht - bis en Funkspruch cho isch und mier zügig los sind, aber de Ranger het eus nid welle verrate, was gsichtet worde isch. Plötzlich gsemmer en grossi Herde Büffel, doch fahred schnurstracks a dene verbi - direkt uf en chline Hügel mit Fels, wo wie bstellt es grosses Leoparde-Männli sitzt! Mer hendem die längscht Zit chenne zueluege, mit allne Büffel um eus ume, wiener gmüetlich i dr Sunne glege isch und richtig für eus posed het... Weder Büffel nu Leopard hend gross Interesse anenand zeigt, wohl wel de Büffel nur Gras frisst und der für de Leopard en zgrossi Büti isch.
Ganz happy hemmer eus ufe Heiweg gmacht und hend per Zuefall en sicher 50 Tier grossi Elefante-Herde gseh. Es het einigi Jungtier drunder gha und si sind ganz friedlich um eus ume am grase gsi. Doch plötzlich het s einte Elefante-Männli i dr Ferni agfange trompete und es isch en Art Panik under de Tier entstande! Sie sind chrütz und quer grennt, teilwis hend si euse Jeep agluegt und mer hend genau gseh, as si nid recht wüssed wohi si selled renne! Mer hend scho chli Angscht gha as eis vu de Tier us blosser Hektik ufs Auto losgaht oder au nur chli achunnt - aber sowit isches zum Glück nid cho. Nach paar lange Sekunde isch de Spuk verbi gsi und mer sind plötzlich wieder alei im Bush dagstande.
Vorem Abig Drive het d Martina scho chli meh Respekt als suscht vorem Busch gha und es isch es isch ihre nid unbedingt drum gsi, numal Elefante z gseh... doch promt hemmer als erschts wieder Elefante gfunde. Zum Glück isches aber eher en chlini und sehr entspannti Elefante-Herde gsi. So isch eus s einte Wiibli bim Fresse immer nöcher cho... bis sie nur nu knapp meh als en Meter vum Jeep entfernt isch gsi. Mer hend sie ghört schnuufe, rupfe und chaue - sogar d Grasbüschel het sie gschüttlet um nid zvil Erde mitzässe! Das friedliche Erlebnis het a dr Martina ihres chline Trauma chli glinderet und so simmer entspannt wiitergfahre. Gli drufabe hemmer en Steenbock gseh, zu Dütsch en Steibock. Unglaublich aber wahr, da hemmer doch tatsächlich was gfunde wo i dr Schwiz mächtiger isch als hie in Südafrika! Der usgwachsnig männlich Steenbock isch ca. so gross wienen Hund, het ca. 2cm langi Hörnli und gseht bim Renne chli so us wienen Has... isch aber en Antilope, sehr härzig und schüch.
Im Hindergrund hets scho afange blitze und donnere, da simmer grad vor zwei Gwitterfrontene gflüchtet. So simmer sogar ufeme Rollfeld zmitzt im Busch gfahre. Nachdem d Sunne wienen rote Fürball under de schwarze Wulche undergange isch, simmer numal zumene Sighting gruefe worde... und hend tatsächlich euses dritte Leoparde-Männli in drü Game Drives derfe gseh, und das erscht nu vu Donnergrolle undermalt.
Ufem Heiwäg hemmer zwar chli vorem Gwitter messe flüchte, doch euse Tracker het wieder mal sis Könne bewise. Im pechschwarze Busch het er so gschnell im Verbifahre zwei Chämeleons und sogar es Bushbaby entdeckt! Randnotiz füre Sämy: Bushbabys sind die Tier usem Madagaskar Film mit de grosse Kullerauge. Churz vorem Camp hemmer zum Abschluss denn au nu es Stachelschwein gseh... wieder mal en unglaubliche Drive gsi! Der Abig hemmer na mit Bier, Wii, Donner und guete Gschichte la usklinge.*Read more