Tea & Nine Arches Bridge Pt.1

Hüt Morge simmer zunere herrliche Ussicht ufd Tee Plantagene vu Haputale ufgwacht. Nid zspat simmer denn zu dr Dambatenne Fabrik ufbroche, wo 1890 vum Sir Thomas Lipton baut worde isch. So wit mer cha gseh sind nur Tee Plantagene, wo flissig vu Arbeiterinne bepflückt werded. Tee chamer offebar jedi Wuche ernte, mer pflückt jewils nur die jüngste Blätter ganz zoberscht. Jedi Arbeiterin muess jede Tag 18 Kilo (!) Tee abliefere, die Lipton Fabrik verarbeitet pro Tag 20'000 kg früschi Teeblätter. Die Blätter werded en Tag tröchnet und gwendet, denn grollt, gschnitte, gsiebet, wieder gschnitte, wieder gsiebet, usw. S erstunliche isch, as die Blätter nie gwäsche werded und somit au anders zu Tee verarbeitet wird... Die Blätter werded bewusst nid vu Afang a ganz tröchnet, damit sie nu fermentiered. Es isch sehr idrücklich gsi die Fabrik azluege, wo immernu mit ganz eifache Maschine schafft und wo für en internationali Firma nid grad so sehr ufd Hygiene achtet...
Derna simmer mim TukTuk zum Ussichtspunkt Lipton's Seat, vu da het er immer uf sis Rich abegluegt. Leider hemmer vor luuter Nebel nid grad vil gseh, aber ufem Abeweg hemmer doch nu es paar schöni Blick derfe gniesse. De obligat Regeschauer hemmer mit Schwizer Lieder überbrückt :)
Na het eus de Sanat uf Ella gfahre, zu de bekannte Nine Arches Bridge. Euses Fotoshooting isch perfekt timed gsi, sogar en Zug isch grad denn duregfahre (die fahred da nur 3x pro Tag). Später hemmer in Ella nu euse erscht Stomusfall gha. Zerscht hemmer gmeint, nur de Strom vu euser Pension sigi am Fredi siner Wifi Sucht zum Opfer gfalle - doch denn hemmer gseh as die ganz Stadt dunkel isch... da het de Fredi wohl grad en sehr interessante Thread gfunde :)Read more