Poya Day Pt.1

Pünktlich zum Poya Day hemmer hüt euse erscht warm Schön-Wetter-Tag in Sri Lanka erlebt! Poya Day isch es Buddhistisches Fest, wo jede Monet zu Vollmond gfiired wird. De Poya Day im Mai isch bsunders, wel i dem Monet Buddha sowohl gebore als au gstorbe isch. Mer hend eusi Rundreis so plant, asmer de Poya Day in Kandy chend starte, da hie de grösst Tempel vu Sri Lanka isch.
Nachdem mer (endlich wieder mal) usgschlafe und guet gfrüestückt hend, simmer in Sri Dalada Maligawa Tempel vu Kandy, wo en Zahn ufbewahrt wird, wo angeblich vum Buddha stammt... Zum Poya Day hets sehr vil Gläubigi gha, mer het ihne dEhrfurcht richtig agseh. Traditionell zieht mer dSchueh vorem Tempel ab, bedeckt Chnü und Schultere und bringt wissi Lotusblüete mit. Im Tempel isches es zimlichs Gedränge, aber am Rand sitzed älteri Lüt mitere stoische Rueh und losed de Gschichte überd Luutsprecher zue.
Am Poya Day gits überall gratis zässe für all, a jedem Ort gits chli was anderes. Uf eusem Weg richtig Dambulla hemmer für es gratis Glace ghalted (wo de Fredi als einzige Westler wiit und breit sogar bete worde isch, übere Luutsprecher en churzi Asprach zhalte!) und denn numal für Maniok mit Chilli Sambal, wo sogar für de Sanat chli zscharf isch gsi. Gsponsored werded die ganze freie Mahlzite vu riiche Iheimische, Unternehme und em Staat - schöne Gedanke!
Derna hemmer binere Batik Manufaktur Halt gmacht. Da hends eus erchlärt, wie sie usere Mischig vu Paraffin-Wachs, Honig-Wachs und Palmharz schrittwis die underschiedliche Flächene abdecked und immer dünkler färbed. Wahri Kunstwerch werded so produziert! En Tipp zum echti Batik-Stoff zerchenne: die helle Farbe mend Riss ha (und zwar uf beidne Siite vum Stoff a dr gliche Stell), das isch det wo de Wachs bim Abchüele bricht und so die under Schicht nid vollständig vor de negscht-dünklere Farb schützt.
Später simmer au nu en Woord Carving Manufactory ga aluege, au das sehr kunstvoll. Am idrücklichschte isch gsi, wie sie die natürliche Farbe misched: us Sägmehl vum Pathangi Rainbow Tree macheds mit chli Wasser roti Farb, durch zuesatz vu Limettesaft mit/ohni Ise und Limestone hets blau, violett und gelb gä. Mit chli Bienehonig wird das Ganze denn grüen - somit au die ufwändigschti Farb, wel all vorige Farbstufene mend durchloffe werde. Die wässrige Farbe werded denn ikocht und verdickt und denn in drü Schichte ufs Holz uftreit, so wird dFarb tief ins Holz inegsoge und verblasst au mim Alter nid.
DMartina het sich en Kandy Tanz-Maske kauft, au Sri Lanka Maske gnennt. Die gits als Füür, Cobra, Adler oder als Pfaue-Maske - die letscht staht für Glück und Gsundheit. Zum Abschied het de Sanat vu de Bsitzer en gschnitzte Elefante-Schlüsselahänger becho... woner im Auto grad ad Martina wiiterverschänkt het, wemer gwüsst het as sie Schlüsselahänger sammlet :)
Churz vor Sunneundergang simmer nu in Rock Temple in Dambulla, en Tempel wo direkt useme Felse ghaue worde isch. In drü Höhlene gseht mer unzähligi Buddhas und Schrin. Last but not least simmer nu churz zum Golden Temple, womer en riesige goldige Buddha gseht. Schliesslich simmer nu uf Sigiriya gfahre, womer au übernachtet.
Fun Fact: wenn en Buddha lit und dFüess perfekt ufenand het, denn schlafter. Wenn hingege de ober Fuess liecht nach hinde grutscht isch, denn ischer tot...
DMartina het hüt ihre Lungi treit (Sarongs träged v.a. Männer) und isch de Blickfang vum Tag gsi. Nid nur de Sämy und de Sanat hend Freud gha, dLüt uf dr Strass hend sich regelrächt nach de Martina umkehrt! Es Meitli het im Rock Tempel denn sogar nu Föteli mit eus welle mache... zdunkel für en Westlerin aber zhell für en Lungi-Trägerin!Read more