Komodos Big 3

Chli verchruglet simmer hüt Morge an Deck erwacht - doch scho in de erschte paar Minute vum 1. TG het sich das schnell gänderet: bim Crystal Rock hend sich so vil Schwarz- und Wiss-Spitze-Hai tummlet! All 100m het mer wieder es paar gseh. Zudem wieder vil Schwärm mit teilwis rächt zuetrauliche Fisch. En Turtle hemmer au gseh, zudem en Blue Spotted Stingray und en grossi, freischwimmendi Muräne - was fürnes Viech!
De zweit TG in Cauldron isch nu besser gsi, doch dHauptattraktion isch nid de dicht bewachsnig "Heizkessel" gsi, sondern dMantas womer scho nach de 2. Minute gseh hend! Ganz enspannt sinds vor eus hin und her gschwumme, teilwis nur paar Meter entfernt. Denn sinds wieder furtgschwumme, aber nach paar Minute wieder cho! Drü Mal sinds cho und wieder gange, herrlichs Schauspiel gsi. Dernach hemmer nu en Hai und en Schildkröte gseh - somit eusi inoffizielle "Komodo Big 3" i eim TG!
En wiitere Manta hemmer denn au bim Schnorchle nachem Zmittag numal gseh. De dritt TG bi dr "Passage II" grad nebedem Cauldron isch denn trotz Hai und Barracuda Schwarm relativ unspektakulär gsi - langsam simmer richtig verwöhnt!
Füre Nacht-TG simmer id Bucht vu Gili Lawa Darat. Mer hend en Pygmy Lion Fish, en Sepia und einiges an Critters (abgleitet vu Little Creatures) gseh. Es paar Minute lang hemmer eusi Lampe usgschalte, dank Fascht-Vollmond hetmer au ohni Liecht nu gnueg gseh, zudem hemmer so mit reflektierende Partikel chenne spile. Es paar Taucher sind eus denn grad entgegecho, die hend sich sicher au ab de dunkle komische Fisch gwunderet :) es wiiters Highlight isch am Schluss vum TG gsi, womer i dr Nöchi vum Strand scho nüm so super Sicht hend gha und leider au einiges an Müll umeglege isch... plötzlich gsemmer da zwei grossi Krokodilfisch! Seinte vu dene Dinosaurier-artige Viecher het denn au grad nach was gschnappet, nur knapp 2m vu eus entfernt :oRead more