First night dive!

Euse Outdoor Schlafplatz het sich langsam etabliert, somit hemmer au die dritt Nacht an Deck verbracht.
De erscht TG hemmer bim Arch gmacht: gstarted mimne negative Istig, denn steile Abstieg ins Blaue uf fascht 35m (!). Nach chli Paddle het en Dropoff uf eus gwartet, zudem en Swim Through mit vilne Fischschwärm in allne Grösse und Farbe.
Bim Zmorge simmer wieder richtig zentrale NP gfahre (mer hoffed au wieder uf chli wärmeri Wassertemperature) - da sind nu grad zwei Delphine uf Bsuech cho :)
Dr 2. TG hemmer wieder in Batu Bolong gmacht, der Felse mim Loch drin, jedoch dismal uf dr andere Siite. Wie scho geschter isches es sehr schöns Plätzli, en Koralle-bewachsne Abhang mit tusige Fisch. Mer hend zwei grossi Barracudas gseh, zudem en grossi Muräne, en Banded Snake Eel und mehreri Skorpionfisch. Obwohls en sehr entspannte Riff-TG gsi isch, simmer doch uf 28m abe! Leider het de Sämy immernu chli Müeh, nach jedem TG heter Chopfweh :( mer probiereds etz mal mit nu meh trinke.
De Sämy het denn au de 3. TG im Norde vum NP, i dr Golden Passage, usglah. Es isch en entspannte Strömigstauchgang mit sanfter Gschwindigkeit gsi. Mer hend mehreri Hai und Schildkrötene gseh, en Banded Seasnake, Parrotfish, Schaukelfisch und schöni Picasso Triggerfish (obe uni schwarz und unne wiss pünktled).
Zum Landgang simmer hüt uf Gili Lawa Darat, au wieder zumene Ussichtspunkt - wenn au nur halb so spektakulär weder geschter.
Doch wieder wie geschter isch sHighlight zum Schluss cho: mer hend nu en Nacht-TG gmacht! Für de Sämy isches sin erschte Nacht-TG gsi, fürd Martina de zweit - aber ihre erscht lit au scho einigi Jahr uf Gozo zrugg. Ganz entspannt inere ruhige Bucht grad vor dr Moana simmer is Dunkle abtaucht. Das Plätzli isch der Tag dure scho super zum Schnorchle, doch znacht isches grad nu um einiges spannender. Durch de Kegel vu dr Taschelampe het mer plötzlich en stärchere Fokus und gseht alles mit chli andere Auge. Die schöne Farbe vu de Koralle, die schüche und teilwis schlafende Fisch - wunderbar! Trotz de Dunkelheit hemmer einiges gseh, u.a. mehreri Lion Fish, en grosse Scorpion Fish, Muräne, "schnappendi" Muschle und zum Schluss nu en Spanischi Tänzerin, die grösst Nudie Branch wos git (rot, glibbrig und eigentlich zimli hässlich). Dank de 29 Grad hemmer au nid emal zchalt gha - bis mer de Wetsuit ufem Boot abzoge hend :) doch da het scho en heissi Schoggi und Duschi uf eus gwartet, herrlich :)Read more