Harpoon fishing & sleepy heads

Euses Natur-nahe Resort Ninamu erinnert eus anen Mischig vu Eco Eden uf Flores und Umlani Buschcamp im Timbavati: durch die offne Bungalows ghört mer jedi Welle und sKnistere vu de Palme im Wind. Mer hätted am liebschte de ganz Tag im Bett verbracht, doch das chline Resort mit grad mal 8 Gäst het en andere Plan gha mit eus: halbi 8i Zmorge und denn am 9ni ab ufs Boot. Am erschte Snorchel-Spot hemmer dMantas leider grad verpasst - derfür hemmer sie später, zämä mit emene Delfin, nu vum Boot us gseh. De zweite Snorchel-Spot isch voll gsi mit schwarze ca. 20cm grosse Fisch - en riese Schwarm isch ohni Scheu ganz nöch zu eus anecho. De "König" isch au awesend gsi: en grosse grüene Napoleonfisch, wo sich vu einem vu dr Crew us dr Hand het la füettere.
Später simmer am australische Bsitzer hinderhergschwumme, während er mit dr Harpune ga Fische isch... innerhalb weniger Minute heter en Grouper und Skorpionfisch abgschlosse gha - idrücklich gsi! Zrugg ufem Boot heter ne es Messer durch de Chopf gstosse, doch de Grouper het trotzdem nu lang gschnuufed und ab und zue gfloppt :o
Mer hend es super Hochsee-Fischerbötli gha - doch womer zrugg zum Hotel hend welle fahre, isch dEbbe scho ztief gsi zum über die flache Sandbänk zcho... somit hemmer churzerhand sBoot vor dr Insle gankeret und sind an Land gschwumme :)
Zrugg uf eusem Inseli het sich dMüedi denn doch numal bemerkbar gmacht - de ganz Nami hemmer i eusem Kabäuschen am Strand verschlafe :) das hemmer wohl nach de Odyssee vu de letschte zwei Täg nötig gha!
Zum Znacht het sich de französisch Choch numal selber übertroffe: nebed Reef Fish hets au Herdöpfelgratin mit Lauchgmües gä... das Heiwehässe het v.a. Martina super gschmöckt!*Read more