Easter Island!

DWartezit am Flughafe in Tahiti isch schneller dure als erwartet, churz vor de 3 hemmer euses riesige (!) Flugzüg chenne boarde. Mer sind zerschte Mal mit LATAM gfloge, de grösste südamerikanische Airline, und sehr zfride gsi: vil Beifreiheit, guets Esse, guets Entertainment und wieder mal en freie Sitz neb eus :) de Sämy het darum fascht de ganz Flug verschlafe.
Uf de Osterinsle hend denn all Passagier messe usstige (au die wo na wiiter uf Santiago gfloge sind) und mer hend zimli langwierigi Ireise-Formalitäte messe durchlaufe - ähnlich wie in de USA. Unglaublich isch au dBürokratie gsi, 3 Formular mit de fascht gliche Infos hemmer messe usfülle: eis fürd Ireis in Chile, eis fürd Ireis ufd Osterinsle und eis wege Ifuehr vu pflanzliche/tierische Produkt...
Endlich im Hotel acho simmer direkt is Bett ga wiiterschlafe - dMartina het fascht die ganz Nacht duregmacht gha. Zum Znacht simmer denn numal is Dörfli (seinzige uf de Osterinsle) und sind vu de vile gmüetliche Beizli sehr positiv überrascht worde: vu eusem Reisefüehrer hemmer eus eher es öds Dorf vorgstellt! Mer mend eus aber nu chli an die chüelere Temperature gwöhne, zum erschte Mal sit Moni uf Flores hemmer hüt wieder langi Hose und en Jagge zum Znacht messe azieh... und dA/C im Zimmer hemmer zum heize statt zum chüele brucht!*Read more