We're hot and we're cold

Nachdem mer die geschtrig Wiiswii Fläsche hend messe büesse, simmer hüt vu Santiago in Norde uf Calama gfloge. Vum Flugzüg us hemmer en herrliche Blick uf die gross, rot Sandflächi vu Calama gha (hie sind au es paar vu de weltgrösste Kupfer-Mine) und de wiss zuckerete Ande im Hindergrund. Vu Calama simmer direkt wiiter uf San Pedro de Atacama, am Rand vu de trochnigschte Wüesti vu dr Welt! Obwohl mer hie uf knapp 2'500m sind, isches hüt Nami richtig heiss gsi - sogar im T-Shirt ischmer gern immer wieder in Schatte ga laufe. DSunne brennt gnadelos abe, das hemmer scho sit Labuan Bajo nüm so extrem gha!
San Pedro isch es charmants, aber sehr touristisches Dörfli - über 100 Tour-Agenture bietet hie ihri Dienste a... dementsprechend schwer isch eus dPlanig vu de negschte paar Täg gfalle. Es sind scho all Toure irgendwie ähnlich und es git wenig prislichi Usrisser, aber irgendwie wett mer de doch die "richtig" Entscheidig treffe und die "perfekt" Agentur finde... Nach langem hin und her hemmer eus denn doch für was chenne einige und hend scho paar Ideä für Bolivie... Aber was fürne Zangegeburt :o mer sind so froh, as Globetrotter eus vil vu de Recherche-Arbet abgno het!
Scho hüt Abig isches denn mit de Toure losgange: nacheme feine Znacht in eim vu de vile charmante chline Beizli simmer ga Sterne beobachte! Dick ipackt (2-3 Schichte an de Bei und 4-5 Schichte am Oberkörper) hemmer eus diversi Sterne, Planete und Sternzeiche zeige la, zerscht vu Aug und denn mit starche Teleskop. U.a. hemmer sChrütz vum Süde gseh (gseht mer nur uf dr Südhalbchugle, zeigt als Pfil zum Südpol mit 4.5x dLängi vum Pfil), Saturn (inkl. Ring!), Jupiter (inkl. 3 vu über 100 Mond), Mars, Skorpion-Sternzeiche mitem Stern Antares (wo wohl gli explodiere wird), dMagellanschi Zwerg-Galaxie (wo usgseht wienes Wülchli am Sternehimmel), natürlich eusi Milchstrass Galaxie... und vieles meh. DAtacama Wüesti isch bi Astonome sehr beliebt, wel durch die höch Lag hets weniger Atmosphäre, durch dTrocheheit weniger Wasserpartikel i dr Luft (selte meh als 15% Füechtigkeit!) und gringi Liechtverschmutzig. Merke möchtemer eus einersits wiemer Sterne vu Planete unterscheidet (Sterne blinked wel sie selber Liecht absonderet, Planete lüchtet heller und konstanter wel sie nöcher sinf und vu dr Sunnd agschine werded)... DMilchstrass chamer sich als flachi Spirale mit mehrerne "Ärm" vorstelle, je nach Jahreszit und Hemisphäre gseht mer entweder de Skorpion-Arm (jetzt im Winter uf dr Südhalbchugle sichtbar) oder de Orion-Arm.Read more