Salar de Uyuni Pt.1

Zum letschte Tag vu eusere Jeep Tour simmer wieder mal am Morge am 5i los... dismal Richtig Norde, um de Sunneufgang im Salar de Uyuni zgseh. Mit über 12'000km2 isches die grössti Salzwüesti vu dr Welt, wie de Salar de Atacama isch sie durch sVerdunste vumene ehemalige Meer entstande. DWüesti isch unglaublich wiss, mit Sechs-Eck gmusteret und vu grau-blau-violette Berge umgä. Anders als die leschte paar Täg isch hüt nid wulchelos gsi, doch das het de Sunneufgang ufem wisse Salz nur nu spektakulärer gmacht.
Zum Zmorge simmer zur Isla Incahuasi ("Hus vum Inka"), das isch en Insle us Vulkanstei und versteinerte Koralle, ca. in de Mitti vum Salar. Dadruf wachsed hunderti Kakteeä, wo grad mal 1cm pro Jahr wachsed - also mit ihrne oft 5m Höchi scho 500 Jahr alt sind! Die Insle isch offebar scho früener vu de Inkas als Rastplatz gnutzt worde, uf dr Route zum hütige Chile und Argentinie um mit Salz zhandle. Damit dLamas dÜberquerig vum Salar guet überstande hend, hends ne gemäss Überlieferig sogar chlini Schüeli azoge, damit die scharfe gfrorne Salzkristall sie nid verletzt hend! :)
Natürlich hend eus euser Tour die typische Touri Föteli vum Salar de Uyuni nid derfe fehle... dadurch as de Salar ganz wiss und putzflach isch, chamer mit de Perspektive spile - z.Bsp. platziert mer en Pringles-Packig nöch vor de Kamera und dLüt posiered 10m derhinder, um dIllusion zerzüge, mer stängi uf de Chips-Packig. De Simon het flissig ghulfe knipse und installiere, oft het er die beschte Ideeä für nu es paar Föteli meh gha.
Ufem Weg Richtig Uyuni hemmer nu churz bim erschte und einzige Salz Hotel Halt gmacht (bestaht zu 100% us Salz, derf aber us Hygiene-Gründ nüm betribe werde) und bim Cemeterio de Trenes, en desolati Müllhalde vu usrangierte, verrostete Züg.
Uyuni het eus nid grad vum Hocker ghaue - v.a. d"Vorstadt" isch v.a. vu halbfertige Hüser, Abfall und streunende Hünd prägt... d"Innestadt" isch denn chli besser, aber mer hend eus zimli schnell ins schöne Hotel de Sal Casa Andina verzoge... hie gniessemer moderni und gheizti Zimmer, en warmi Duschi und freued eus, hüt znacht nüm dick ipackt messe zschlafe :)*Read more