Sunshine, warmth & sightseeing

Nacheme fuule Morge simmer hüt gege Mittag in Parque Bolivar, en sehr gepflegte Garte mit Mini-Eiffelturm, btw vum gliche Erbauer wie sOriginal in Paris. Sehr französisch isches denn au zum Esse wiitergange, im herzige "La Taverne" gits denn au die passende Wandmalereie. Leider hets da aber au die obligate französische Touris, wo sich vum ganze schattige Innehof de einzig Sunnetisch ussueched - zum denn 5 Minute später vu de Chellnerin zverlange, as sie doch de Sunneschirm sell ufspanne...
Denn simmer zumene churze Abstecher zum Bus-Terminal, zum euses Ticket für de morgig Nacht-Bus uf La Paz zchaufe. Da isch eus öppis ganz speziells passiert: online bechunnt mer sones "Luxus"-Ticket für 180 Bs (ca. 9 CHF), de Verchäufer het eus gseit hüt choschtets nu 150 Bs, aber wenn mer morn zruggchemed, denn sigis nur nu 100-120 Bs... mer hend denn gseit für eus siged die 150 Bs scho guet, so mesemer morn nur einisch zum Terminal cho - da heter eus dTickets denn doch für nur 120 Bs verchauft :o mier hend dWelt nüm verstande, Bolivie funktioniert offebar nid so so ganz kapitalistisch...
Nacheme churze Rundgang durch sMuseum für Ethnografie & Folklore (über Chinderarbet und kunstvolli Brosche... jap, komischi Mischig!) simmer zrugg uf eusi Hotel-Dachterrasse und hend die herrlich Sunne und Wärmi gnosse! So schön sich nüm ganz so dick messe izpacke und sogar barfuess chenne zsi :)Read more