On top of Pico Austria on 5'377m Pt.1

Hüt Morge simmer zu eusem zweitägige Trekking i dr Cordillera Real ufbroche - euse Bergfüehrer Macario isch eus am 6i ga hole, denn simmer sganze Material ga lade und euse Choch Ruben ga hole (bi günstige Toure isch de Guide au grad de Choch, aber zertifizierti Bergfüehrer choched nid so gern fürd Gäst). Bi de Usläufer vu de Cordillera Real (scho uf ca. 4'400m) hemmer denn sGepäck uf drü stoischi Eseli glade - und denn simmer ufbroche, en gfühlti Expedition zur Erstbestigig vum Pico Austria: mier zwei, zämä mit Guide, Choch und es Fraueli mit Tochter zum Triibe vu de drü Esel... :D
Zerscht isches relativ gmächlich ind Höchi gange, verbi an Alpaca-Herdene (wo übrigens chliner und runder sind als Lamas, ähnlicher zu Schaf) und chline Bergseeli. Denn isch eusi Esel-Entourage richtig Refugio abboge und mier sind steil deruf, bis öppe halbi Höchi vum Berg. Mer hend am Morge Fresspäckli füre Tag becho, mit Cracker, Frücht, Saft und Wasser - womer zum Zmittag ghalte hend, hend mier automatisch die uspackt. Doch da het euse Choch Ruben afange sin Rucksack uspacke: früsche Ziegechäs, Fleisch, Tomate, Gurke, Olive, Brot und Sösseli - was fürne Luxus uf 4'900m!
Nach dem feine Zmittag isch de Ruben zruggblibe und mier sind mit Macario wiiter, steil über Gröll deruf. Ab da simmer froh gsi umd Stecke wo de Michael eus empfohle het zum mitnä, es het ghulfe sGlichgwicht bim langsame Ufstieg zbhalte... Für die letschte knapp 400 Höhemeter hemmer denn au ca. zwei Stund gha - imene laaaangsame Berner-Schritt :D doch scho so hemmer ghörig biestet!
Stolz simmer denn bim Gipfel vum Pico Austria acho, uf 5'377m - so höch simmer beid nu nie gsi! Vu da het mer en herrlichi Wiitsicht, nid nur ufd die umliegend Cordillera Real, sondern bis zum Titicaca See!
Derab simmer denn sehr schnell gsi, knapp 1.5 Stunde später simmer im Refugio acho und hend binere Tasse Mate de Biscachas bim spile und sünnele zuegluegt.
Etz liegemer dick in Thermo-Chleider und Schlafsäck ipackt imene chline Zelt vorem Refugio - gli gits Znacht und denn memmer scho gli mal undere, zum nu vorem Tagesabruch zu eusem zweite Gipfel, em Pico Tarija, ufzbreche.Leia mais