Pampas, baby! Pt.1

Hüt isch scho früeh Tagwach gsi, wel hüt isch Wechseltag! Vum amazonische Dschungel/Regewald Madidi simmer hüt ind Pampas del Yacuma gwechslet, dWetlands vorem Dschungel. Daderfür hemmer über Rurre messe ga chere, also simmer zerscht mim Boot 1.5 Stund durch de morgentlich Nebel gfahre und denn vu Rurre 3 Stund mim Auto ufere sehr staubige Strass bis uf Santa Rosa. Beid Weg sind relativ abentürlich gsi: ufem Fluss simmer mal so blöd uf en Sandbank ufegfahre, as euse arm Helfer bis zur Hüft is chalte Wasser het messe. De Weg ind Pampas isch au nid ohni gsi, es het so vil Staub gha asmer teilwis nüt meh gseh het - usem Nüt het plötzlich Gegevercher oder Gauchos mit Viehherde chenne uftauche :) es paar Mal hemmer denn au am Strasserand ghalte, entweder zum Fuultier zbeobachte, Storche oder Capibaras zgseh.
In euser neuer Lodge Caracoles het eus de Guide Marcelo in Emfpang gno, er schafft scho über 20 Jahr als Guide. DTour teiled mer eus mit de zwei Schwizerinne und Globetrotter-Mitarbeiterinne Anja und Irmgard ("Irmi") und de Französin Rosalie.
Nachem Zmittag (mit Sichtig vumene Kolibri!) und obligater Siesta (da in de Pampas isches tagsüber sooo heiss!) hemmer eus mitere Nussschale flussab triibe la. Da etz Trocheziit isch und de Fluss somit nid vil Wasser het, isch etz en super Zit zum Tier beobachte. So hemmer all paar Meter Spectacle Caimans gseh (werded bis zu 2.5m lang - im Gegesatz zu de Black Caimans, die werded bis zu 7m lang!), Capibaras (btw die grösste Nagetier vu de Welt), Chicken Birds (offebar nid nur Watson sondern au Serere gnennt), Heralds und vile wiitere Vögel. An zwei Plätzli hemmet bsunders Glück gha: da hemmer bruni und schwarzi Howler Monkeys in de Baumchrone gseh fuulenze und luuse, und i dr einte Flussbiegig isch eus sogar en pinke Flussdelfin entgegecho! DTour hemmer denn mit Sunneundergang-Watching abgschlosse.
Zrugg i dr Lodge het en chalti Duschi und en gegesitigi Zecke-Inspektion uf eus gwartet: tatsächlich hemmer je zwei chlini Zecke binenand gfunde! Dernach hemmer de Abig gmüetlich und Zecke-frei mit Bier, Znacht und Reise-Gschichte la usklinge.Read more