A looong day on the road

Hüt simmer wieder in aller Früeh uf - planmässig hättemer churz nach de 5i vu Bolivia / Peru Hop selle abgholt werde... us 5i isch 6i worde, doch womer scho fascht dHoffnig ufgä hend, isch euse Van cho. Doch anstatt eus zum Bus zbringe, simmer ines anders Hostel zum Warte bracht worde: euse Bus heig en Unfall gha... guet, denn hemmer det numal knapp zwei Stund gwarted, denn simmer mimne wiitere Van an Stadtrand zu eusem Ersatzbus bracht worde. De Unfall-Bus isch au det gsi: offebar isch en entgegekommende Lastwage vu dr Fahrbahn abcho und de Busfahrer het messe uswiiche - derbi isch die eint Siite vu de Fahrerkabine beschädigt worde, doch zum Glück isch niemert verletzt worde...
So simmer also mit drü Stunde verspätig us Arequipa losgfahre. De Rescht vum Tag simmer duregfahre (und serschte Mal sit de Osterinsle wieder sMeer gseh!) und hend ei Film nachem andere gluegt - vu Disneys Herkules, über Everest bis zu The Rock. Leider simmer erscht nach Sunneundergang in Nazca itroffe, so hemmer leider kei Chance meh gha zum die berüehmte Nazca Lines zgseh... es paar Stunde später simmer etz in Huacachina acho, en Oase i dr Wüesti. Mer sind gspannt das Ganze morn bi Tagesliecht zgseh!Weiterlesen