Islas Ballestas & slavery

Nur en churzi Bootsfahrt vor Paracas lieged dInsle Ballestas und de glichbenennt Nationalpark. Bekannt sinds v.a. weg de 600'000 Vögel, Humboldt Pinguine und Seeleue - mer nennt sie au d"Galapagos für Armi". Da mier die richtige Galapagos Insle mittlerwile usem Programm gstriche hend, hemmer eus die Budget Version (für 15 USD) nid welle la entga la.
Scho vu wiitem hend eus Formatione an Cormoran empfange, dicht überem Wasser sind in lange Chettene gfloge und ab und zue zum Fische abtaucht. DIslas Ballestas sind eigentlich nid meh als es paar usghöhlti Felsblöck wo usem Wasser raged, doch vor luuter Vögel gseht mer oft de Fels nüm :o so vil Gflügel produziert au vil Kot - das isch der begehrt "Guano" wo au scho de Chrieg zwüschet Chile, Bolivie und Peru usglöst het. Au etz nu, trotz Naturschutzgebiet, wird der Dünger all 8 Jahr abbaut - bi dr letschte "Ernti" im 2011 sind 7 Tonne Guano igsammlet worde... did chline Humboldt Pinguine hend eus sehr and Pinguine in Boulders Beach in Südafrika erinneret (scho 5 Mönet her!) und dSeeleue hend sich gnüsslich a dr Sunne gwärmt.
Nachdem mer am Mittag erfolglos nachem Golfplatz vu Paracas gsuecht hend (hie isch alles eher uf Halbmast - wenn nid scho ufem abstigende Ast), hemmer eus anere wiitere Peru Hop Tour in Nationalpark agschlosse, diesmal ufem Landweg. Einersits gseht mer da de "Candelabro", en gheimnisvolle, riesige in Sand zeichnete Cherzeständer (oder en Kaktus, je nachdem wer mer Fragt) und wiss-gelb-roti Wüesti wo teilwis abrupt ins dunkelblaue Meer abfallt.
Später simmer denn mim Bus wiiter uf Chincha, scho vor de Inkas het die Kultur Handel betriebe und während de Inka Zit hend dChinchas all Kurier und Transport fürs Riich organisiert. Da hend sich au die grosse spanische Landherre niederglah, wel sKlima gäbig zum Abaue vu Baumwulle und Zuckerrohr isch. Scho gli sind au die erschte Sklave vu Afrika importiert worde - v.a. nachdem mer gmerkt het, as dAfrikaner nid für Minearbeit geignet sind (wohl weg de Höchi und Chälti) isch in Chincha struurige Zentrum vu dr Sklaverei entstande.
Ab de peruanische Unabhängigkeit isch zwar de Import vu Sklave verbote worde und all wo nachem 28. Juli 1821 gebore worde sind, hend als freii Mänsche golte... doch de Mänsche-Handel isch im Versteckte wiitergange. Zwüsche de einzelne Landhüser und em Hafe sind Tunnels baut worde - zerscht für de Transport vu Güeter, denn au fürd Verschiebig und Unterbringig vu Sklave. Mer sind im alte restaurierte Landhuus San Jose es paar vu dene Tunnels ga ablaufe - unglaublich under was für unmänschlichi Bedingige det hend messe Mänsche uf engstem Ruum zämälebe! 1854 isch denn sSklaverei in Peru komplett verbote worde - wohlverstande 11 Jahr vorem Verbot in de USA...
Etz isches fascht Mitternacht - mer sind grad in Lima acho (und inen Suite upgraded worde)... im vorletschte Hotel vu euser Weltreis! Zum erschte Mal sit San Pedro de Atacama im Norde vu Chile werdemer 3 Nächt im gliche Hotel verbringe - die letschte 1.5 Mönet simmer jewils immer nach 1-2 Nächt wiiterzoge :o es isch es schöns und Ereignis-riichs Nomade-Lebe gsi, doch chli meh Rueh tuet eus uf did letschte paar Täg vu dr Reis wohl au guet... in dem Sinn: buenas noches!*Read more