2. Mal Cancun

Vo New York wieder uf Cancun zrug, hani zerschmal en Roller gmietet.
Tönt guet, isch aber nöd s beschte wenn mer bedenkt dass d Touristepolizei in Cancun ganz wenig korrupt isch. So hammer nöd welle 1km ih 1 Richtig welle fahre zum denn wieder wände, sondern sind eifach quär über d Strass gfahre über es chlises Müürli. Gueti Polizischtw sind die wo so sache vo wiitem gsehnd. So händs eus also ahghalte und gfrägt ob ich e Ahnig han werum sie mich ahghalte hend. Hä nei was??!! Ahaaaaaa ich hn nöd derfe über de Randstei fahre?!?! Okay sorry das chunnt nümme vor. So wiitbso guet.
Jetzt het die Trulle wäge dem aber welle min Fahruswiis ihzieh, sodass ich en am negste Tag wieder het chönne ufem Revier go hole. Willich aber ja leider bereits am Folgetag wiitergfloge bin isch das halt für mich nöd gange. Denn het sie welle d Nummereschilder ihzieh, der Vermieter chöngs ja go hole... Ah come on, wie viel isch d Buess.
"20 mal de Tagesmindestlohn vo 6 Franke" (also 120). Hmm hetmi chli viel dunkt, drum hani gfregt ob sie mir au chönnt zeige wo dass das schriftlich staht, ich hegi ja jetzt eigentli nur ihres Wort als Basis. Nach 15min hend sie denn de Artikel 81 ih ihrem Verkehrsbuessebüechli gfunde wo das beschriibt woni falsch gmacht han. Under dem Artikel isch denn en Priis gstande vo 5 bis 10 Tagesmindestlöhn (also 30-60.-). Uf de andere Siite hets aber Tatsächlich en Artikel 86 gha under wellem de Priis 15 bis 20 Tagesmindestlöhn (90-120.-) gstande isch. De het aber ganz was anders beschriebe. So hät sie also uf de Text vom Artikel 81 zeiged und uf de Priis vom Artikel 86 uf de nägste Siite. So hani halt gseit, dass es kei Sinn macht was sie mir beschriibt. Es verstaht doch kein Normaldenkende Mänsch warum de Priis vom Artikel 81 underem Artikel 86 staht ubd de Priis underem Artikel 81 nid gültig isch.
Naja, wenn ich ihre nöd glaube, chöng ich ja au grad mit ihre ufs Revier. Moooment: "liebi Polizischtin, ich finds ja guet, dass sie sich so um d Sicherheit vode Verkehrsteilnähmer nämmed, und ich bin mer mim Fähler au bewusst. Au dass sie mir genau erkläred wie das Büechli ufbaue isch und was d Folge hetted chönne sie, find ich nett. Jetzt isches aber doch eso, wenn mer e Buess sofort zahlt, denn reduziert sich die doch ide meiste Länder um 50%. Mir reded jetzt da vo 15-20 Tagesmindestlöhn, nemmemer als Basis mal die 15 (90.-). Jetzt halbieremer die und rächnets in Dollar us (mite eme vo mir aerfundene Umrächnigskurs vo 27 Pesos pro Dollar anstatt wie in Eürklichkeit 17 Pesos pro Dollar), denn simmer genau bi 32 Dollar. Ich träge mit mir genau 30 Dollar (han öppe s 5fache gha), chan ich ihne das nöd eifach geh, ich versprich dass ich das nie meh mache und mir rächned ihne defür mega höch ah, dass mir eusi Ferie wiiter gnüsse chönnd?"
Nach ere churze Abklärig mit de andere 3 Polizischte im Auto hends es denn usnahmswiis akzeptiert und eus drum bätte ab jetzt würkli uufpasse (naaaaatürlich isches ihne hauptsächlich um das gange).
Was lärntmer drus? - d Polizei in Cancun isch sehr zuvorkommend und Komoromissbereit, so wiemmers gern het 😉
Abgseh vo dem isch nöd viel spannends passiert usser en schöne Strand, e gsundi Früchtenudle und es Bad ineme Cenote (natürlich entstandeni Badelöcher in Felse wos NUR in Mexiko huufewiis git).
Vor de Unterkunft hets jede Taag e anderi Versammlig vo Tier gha 🙂
D Vermieterin het denn no Angst gha dasi de Roller über Nacht dusse stah lahne, er chan ja klaut wärde.. So ischs denn aber nöd gsi 🙂Read more