Wältreis

Es wiiters highlight vo minnere Reis isch definitif die 3 Tagestour ab Flores Islands gsi. Defür hani am Vortag müesse de Flüger vo Bali uf Labun Bajo gno. Per Zuefall sind d Melina und ihre Fründ genau im gliiche Flüger ghocked wie ich, will au sie sone Bootstour gmacht hend. Denn hemmer also de ganz Taag mitenand verbracht, sind nachli go ässe und go chille uf ere Terasse. Unerwarteterwiis no würkli easy schön gsi, "or"?😂
D getränk hemmer sälber müesse mitneh, 3 Malziite/Tag und Wasser hets ufem Boot geh. So simmer also am Abig no in Supermärt, hend ziemli tüürs Bintang-Bier kauft (isch scho e Muslimischi Insle gsi) und hend das zum Reisebüro vom Bootsunternehme bracht.
Am negste Morge bini denn natürli wieder mit eme Bolt Töff zum Träffpunkt gfahre und vo det denn zum Boot woni zersch gmeint han es seged alles chli komischi lüüt druf. Das hani denkt will vom Unternehme 2 Schiff gstartet sind und eigentli alli Junge ufs andere hend chönne. Schnell ischmer ufgfalle, dass viel Latinos umenand sind, wasi natürli top gfunde han, aber au die sind mehrheitlich elter gsi. De Rucksack mitem Schwiizerchrüüz hani au schnell gsichtet, aber er isch vo sonnere Spasstina treit worde.
D Idee vo dem Boot isch gsi, dasmer östlich uf Flores startet und nach mehrere Stopps uf vielne Insle schliesslich in Lombok ahchömmed.
Das boot het scho Kabine gha, wemmer die 4 Quadratmeter näbem Motorruum (sehr heiss und sehr luuuuut) eso will nänne. Wemmer de Priis aber nöd uf 2 Persone het chönne ufteile, het sich aber s maträtzli ufem Deck zämme mit 24 Lüüt meh glohnt. Ja genau, 50cm breits und öppe 3cm dicks Mättli. Vom luut schnarchende, oder eher grunzende/schreiende Uruguayer treumi hüt no!
Aber s chunnt besser, s einte Päärli us Malaga (Raquel und Alex) hend uf dem Deck gad ihri Flitterwuche verbracht 😂
Bim erste Stop (het so usgseh dasmer denn alli gruppewiis vom grosse Boot mit eme chliine Böötli für öppe 8 Persone as ufer gfahre worde sind). Zuefälligerwiis bini uf dem chliine Böötli gad gägenüber vo dere Spasstina und ihrere Kollegin ghocked und han mi durch die gmeinsam Sprach schnell id Unterhaltig inegschnurred 🙂 woni denn doch no schnell zrug zum Boot han müesse (richtigi Schueh vergesse, oupss) und sie nach minnere Rückkehr no immer uf mich am warte gsi sind, hani denkt die müends sii!! Weiteres vo ihne folgt.
Ja wer isch sus no so ufem Boot gsi: Miss Colombia, miss pinkie us Ecuador, dä argentinischi Ramiro wo sich d Unterschrift vom argentinische Nationaltrainer ufs Wädli tättowiere lah het, 2 komischin Spannierinne die arme Engländer wo für eimal mit ihrere Sprach in Unterzahl gsi isch, die 2 franzosechinde wo aber gliich alt gsi sind we ich.., de leo us Argentinie wo anschiinend millionär isch (nöd nur in pesos), es Pärli (Slowak wo niemmer richtig schlau worde isch mit sinnere französische fründin) und no es elters pensionierts ehepärli us FR wo meh reist als ich.
De ersti halt ich uf de Insle gsi wos Komodo Dragons git, es mega starchs, giftigs und gfährlichs Tier. Uf dere Insle hetts en Hügel geh mit meeega schöne Ussichte und eme erste Gspräch mitem Alex.
Wiiter hemmer ah soneme indigene Dörfli ghalte wo no sehr unerkundet und unbebaue gsi isch..En savoir plus