12. 1. Tag Sägutour ⛵

Hüt geits los mit dr Sägutour.
Mir si mega ufgregt was üs aues erwartet.
Mir stöh früeh uf dasmer pünktlech am haubi 8i üsi grosse Rucksäck chöi zum Boot bringe. Dert wärde si verstout. Bruche düe mir nur no e chlinere "Tagesrucksack" mit dä Utensilie zum übernachte.
Nähr heimer no e Stund Zyt zum ga z'Morge z ässe und usem Hotel uschecke.

Am haubi 9i simer wieder bim Stäg und warte druf bis d Crew seit es geit los.
Gsamthaft chunnt e Crew vo vier Lüt mit. Dr Captain isch dr Ish, dr Choch dr Linton und zwöi Crew Mitglieder dr Marvin und dr Nas.

Leider hets chli zweni Wind zum nur z Sägle, drum simer ziemlich viu no mitem Motor gfahre. Dür d Karibik sägle ufemne Katamaran mitemne Drink ir Hand isch eifach grandios!
Währender Fahrt isch z Ziu z z'Nachtässe z fah. Drum heimer hingerem Boot d Fischerruete useghänkt.

Zwüschedrin mache mir Haut zum ga Schnorchle und d Crew geit iz Wasser ga Speerfische. Mir dörfe mit ihne ga und luege ob si öpis föh.
Mir si mitem Ish mitgange und hei nach Barracudas gjagt. Tatsächlich het dr dritt Versuch klappt und är het nä troffe. Z z'Nacht isch gsichert.
Leider heimer dr ganz Tag ke einzige Fisch mit dr Ruete gfange und oh nüme bim Speerfische.

Ds Endziel füre hütig Tag isch Rendez-Vous Caye. Ä mega chlini Insle womer düe Zäut ufstelle und Übernachte.
D Insle isch e absolute Troum. Eifach Sand und Palme mit eim Hüsli wo dr Insuhüeter, dr Mr. Bobo, wohnt.
Mir chöi i paar Minute einisch um d Insle loufe.
D Stachuroche begrüesse üs direkt am Ufer und üsi Crew bechocht üs mit ungloublech feinem Ässe.

Uf dr ganze Tour het dr Alkohol nit gfäut. Scho nachem Mittag isch Rum Punch usgschänkt worde und uf dr Insle heisi e Bar ufgstellt wome e Horde Hooligans hät chönne betrunke mache.

Mir ässe aui Zämä znacht und heis sehr lustig i üsere 14 Köpfige Gruppe.

D Crew isch mit üs no cho Spili spiele. Mir hei Sumi-Sumi gspiut.
Äs mega lustigs Gruppespiu wome muess trinke weme fausch isch.
Nähr isch no es Spiu drzue cho; ä Kartonbox ir Mitti und me muess ohni d Händ z bruche di Box mitem Muu ufnäh und es Bitzli abrisse.
Es wird immer schwiriger wöu ja d Box immer chliner wird.
Und wemes nid schafft? Natürlich trinke 😂😍

Ir Nacht heimer am Stäg no öppe 4-5 Adlerroche gseh wo ihri Rundine hei dräit.🥰🐟

Ps:
D Reglä für d Toilette uf Rendez-Vous Caye.
If its yellow let it mellow, if its brown flush it down. 😂Read more