15. Zrügg nach Mexiko 🌯🌮🇲🇽

Hüt isch wider chli Reise agseit. Mir fahre am Morge in Belize City los und hei aus Ziel Bacalar vor Ouge.

Z fahre dür Belize isch sehr schön, aues mega grüen und wiud. Anschinend het Belize ä grossi Zuckerindustrie. Mir gseh überau Lastwäge wo vouglade si mit Zuckerrohr. Ungerwägs gsehmer de o mau paar Lüt wo dr Zuckerrohr am ärnte si; aues vo Hand mitere Machete am abschnide.😳

Mir si gar nid scharf druf füre Grenzübertritt nachem letschte Debaku!
Item, am haubi 3 und 100 Stutz ärmer simer de wieder in Mexiko.
Belize het üs 40 Stei abgnoh als Administrationsgebühr und die restliche 60 hei üs d Mexikaner usgrisse für was das isch gsy wüsse mer bis hüt nid.

Mir fahre aber glücklech witer und chöme öppe ä Stund später in Bacalar ah.
Am spätere Nami gömer no chli ga z Stedtli erkunde und bewundere di schöni Lagune. Bacalar säuber isch oh mega härzig mit viu chline Lädeli, Bars, Strassekunst und überau grüen.

Zum Znacht simer im La Pina. Vo usse es chlises Restaurant und hinde tuet sech ä mega schöne Garte uf.
Mir plane üsi nächste Täg und fröie üs mega fescht ufs mexikanische Ässe. 😍🥰🌮🌯Meer informatie