16. Bacalar

So früeh simer i üsne Ferie gloub no nie ufgstande.
Dr Wecker lütet nämlich scho am viertu ab 5i. Mir hei vor am haubi 7i uf dä SUP's z stah und dr Sunneufgang uf dr Lagune z gniesse.

Mir hei gester Abe no öpis Zmorge kouft, i ha sit langem wieder mau Froot Loops gässe. Di künstlich, feine und fruchtige Corn Flakes. 😍😂 Und d Rahel het Nesquik gnoh. 🤤

Üse Guide dr Angelo verzeut üs viu spannendi Sache über Bacalar und ihri Lagune.
Nachem Sunneufgang paddle mir süsch no ufem See ume und bsueche zwöi Cenote: Cenote Negra und Cenote Cocalito.
D Cenote Negra isch 200 Meter töif!

D Lagune in Bacalar isch entstande düre Zämeschluss vo verschiedene Cenote. Die si quasi igstürzt und hei e grossi Lagune bildet. Es isch di grössti permanenti Wasserquelle uf dr Yucatan Halbinsle und wird dürne länge ungerirdische Fluss gspise.

Nach dr öppe 3 stündige Tour chöimer im Beach Club no chli reläxe und Schlaf nachehole. 😴
Schnäu wirds üs aber dert chli z vou und mir mache üs vom Acker. 👋

Mir göh iz Stedli ga Zmittag ässe und Wäsche.
Am Nami gömer iz am südliche Endi glägene Xul-Ha. ("Ha" heisst uf Maya Wasser).
Mir finge ganz e chline Beach Club wo nume Iiheimischi si. Es schöns Steisträndli womer Liegestühl bechöme und bis am Abä eifach mau nüt mache. 🥰

Wüu mir gester so ungloublech guet hei gässe und so es tolls Ambiente hei gha, simer nomau am gliche Ort ga esse. 😂😍🍍Iz La Pina!Read more