14. 3. Tag Sägutour ⛵

Äs geit wider früeh los hüt. Zersch gits mau wider äs mega feins z'Morge vom Linton🤤 u am haubi 9i sägle mir los. Hüt geits nit so wit, mir si öppe 45min ungerwägs zumne Naturschutzgebiet. I däm Park chame mängisch Manatees beobachte, mir hei mega Glück und gseh gad zwöi🥰 Nähr sägle mir no chli witer u chöi no ga Schnorchle. Äs isch mau wider mega schön, glasklars Wasser und so viu Fischli und Koralle. Mir hei mehreri Adlerroche gseh und ä rise Schiudchrot🥹
Nachem Schnorchle geits witer uf Tobacco Caye, ou ä mega härzigi Insle mit Bungalows drufe. Mir nähme aui zäme äs chüeus Bier und mache äs churzes Pöiseli. Ufe Mittag sägle mir zrügg zur Ragga Caye wo üs scho äs mega z'Mittag erwartet🤤

Mir hei nachem ässe no churz Zyt zum ga Dusche und üsi 7 Sache z packe. När geits scho zrugg nach Dangriga.
Mir verabschiede üs vo dere grandiose Crew und stige iz Boot ih wo üs zum Festland bringt. Mir wärde direkt zur Busstation gfahre wo när aui wieder ihrne eigete Ziel nache göh.

Mir hei glücklecherwiis gad 30 min später ä Bus wo üs am haubi 7i in Belize City sött uslade. D Busfahrt isch haut wimes kennt, ängi Sitze, es tschädderret und nach 1 Stund duet eim z Füdle weh. 😂👋
Nach 3 Stund chöme mir planmässig in Belize City ah, mir näme es Taxi zum Parkplatz, hole üses Outo und göh ines Hotel.

Mir luege uf unfassbar schöni und unvergässlichi 3 Täg zrügg. Es isch eifach bombastisch gsy. 😍🥰⛵🏝️Read more