Återställ sökningen
NiLe entdeckt d Wält
  • Nives Fries
  • Lea-Noemi
  • Nives Fries
  • Lea-Noemi

NiLe entdeckt d Wält

Am 15.12.19 startet eusi Reis in Bangkok.
Für alli wo neugierig sind, was mir für Abentüür erläbet und welli schöne Plätz mir entdecket, ghits immer mal wieder es paar Föteli.
Bis bald, Lea und Nives Läs mer
FöljÖversiktÖversiktKalenderKalenderFotonFotonDelaDelaBucket list
Nyast först
  • Resans start
    15 december 2019
  • NiLe entdeckt d Wält
    1Powernap ;)1Khao san road, crocodile BBQCoiffeur am Bahnhof Hualamphong BKK

    Bangkok - Chiang mai

    18 december 2019, Thailand ⋅ 🌙 23 °C

    D’Grossstadt Bangkok händ mir hauptsächlich verschlafe.. s Jetlag hät eus no voll im Griff. Trotzdem hemmer s eint oder s andere gseh und en altbekannte, de Dino, zum z‘Nacht troffe. :)

    Spontan hemmer eus entschiede mitem Zug uf Chiang Mai z‘fahre. Da aber hoch Saison isch, häts natürli im Nachtzug kein Platz me gha. Doch au nach 13h, mitem abeküehlte „special express“ und eusne guete Büecher (danke Papi), sind mir guet acho und hend sogar no öbis zesse becho😁🙌.
    S‘Hostel, wiemer sich das vorstellt, Kajütebett und Party bis früeh am Morge ;).

    Die nögste Täg versuechemer so wenig wie möglich ufem Füdli z sitze.. ;)    Läs mer

    Se översättning
  • NiLe entdeckt d Wält
    E Massage hett au nöd döfe fähleTuktuk fahre...Mit de ÖV unterwägs :)

    Chiang mai - Chiang rai

    22 december 2019, Thailand ⋅ 🌙 18 °C

    Die einte hend eus scho vermisst aber mir läbet no und sind wohl uf. 😌

    Chiang mai hät eus vorallem kulinarisch verwöhnt, ah jedem Ecke häts wunderbari Kafis gha und die viele Vegetarische Restaurants händ super zu eus passt. D Lea hett no e Gripp verwütscht, doch nach 2 Täg isches au ihre wieder besser gange.☺️
    (Mami, zum Glück hemmer dini Chügeli debi 😘)

    Nach zwei Nächt Chiang mai, sind mir mitem Green bus, 5h i d Berge gfahre uf Chiang rai. Vo Chiang rai händ mir für 50 Baht (1.65 CHF) de local bus zum Duck Restaurant gno (für 32km 1.5h) wo eus de Simon und d Thay abgholt hend.

    Ih ihrem Airbnb hend mir vorallem entspannt und am zweite Tag, mit zwei anderne Gäst us England, de Sue und em Michael, sightseeing gmacht.
    Opium Museum, de Määrt bi de Grenze zu Myanmar, s goldene Drüeck und „shopping“ in Laos.

    Wär hett gwüsst dassmer in Thailand Polo mit Elefante anstatt Pferd spielt? 😅 De Simon hät eus viel über Thailand und sis läbe verzellt und mir sind schochli trurig verlönd mir das wunderschöne Plätzli morn.

    Nächsti Stop wird de Grenzübergang zu Laos sie, wo mir s Visum beaträget und döt ei Nacht schlafet. Aschlüssend wär s Ziel es Boot ufem Mekong z verwütsche und mit dem zwei Täg uf Luang prabang z fahre.

    Mir wärdets gseh ob alles klappt. ☺️    Läs mer

    Se översättning
  • NiLe entdeckt d Wält

    Luang Prabang

    24 december 2019, Laos ⋅ 🌙 25 °C

    Fröhlichi Wiehnachte wünschet mir eu allne!💫

    Mir sind 300km und 15h spöter in Luang Prabang mit em Slowboat acho. D‘Fahrt isch entspannend, abentürlich und wunderschön gsi. D‘Landschaft hett eus verzauberet!

    Am erste Tag, hemmer no e chlini Panne gha, de Motor isch zmitzt uf de Strecki usgfalle und drum simmer 2h verspötet ahcho. Natürlich ohni Licht am Boot, was chli kriminell gsi isch😄.

    De Abig vom 24.12 händ mir mit zwei Dütsche und ere Holländerin verbracht. Zämme znacht gesse und go Billard spiele - perfekt!

    Uf de zweite Bootsfahrt hett jede vo eus en eigne Autositz gha und d fahrt hemmer mit UNO spiele und Landschaft gnüsse verbracht.

    Absolut es unvergässlichs Erlebnis gsi!

    Schlönd eui Büüch voll mit feinem Esse, mir lönds eus hüt au guet gah miteme „tüüre“ Hotel (28chf für 2 Persone) und ere feine Pizza!
    Merry Christmas😘✨    Läs mer

    Se översättning
  • NiLe entdeckt d Wält

    Luang Prabang

    27 december 2019, Laos ⋅ ☀️ 25 °C

    3 Nächt im Städtli Luang Prabang gönd z‘End. Diversi Kafis und Restaurants händ mir usprobiert, dur de Nachtmäärt simmer gschlenderet, d Mönche beobachtet und d Wasserfäll (kuang si falls) agluegt. Am Abig hemmers eus inere wunderschöne Bar gmüetlich gmacht und händ eus no mit es paar anderne Touriste uf de Wäg inen iheimische Club gmacht. D Musig isch nöd ganz euse Stil gsi, aber trotzdem es lustigs Erläbnis gsi. 😁

    Morn heissts Minivan fahre, richtig Nong Khiaw, die wunderschöni Natur go bestuune.    Läs mer

    Se översättning
  • NiLe entdeckt d Wält
    21

    Nong Khiaw

    29 december 2019, Laos ⋅ ☁️ 21 °C

    Ufem hiiwäg uf Nong Khiaw händ mir de hinterletsti Platz im Minivan becho und händ müsse neb zwei Iheimischo hocke. D Fahrt isch sehr holpprig und turbulent gsi, trotzdem hett de Laot neb de Nives uf ihrere Schultere gschlafe, d Nives uf de Lea ihrer und d Lea uf ihrem Sitznachber sinere. Das hend natürli d Franzose vo de vordere Reihe sehr lustig gfunde 😄.

    Am erste Abig und Morgä hetts grägnet und s’isch chalt gsi. Aber wiemer so schön seit: „nachem Räge schiint d Sunne“.

    Wiedermal hett eus die wunderbari Natur überwältigt! Nacheme 1,5h ufstieg händ mir en Ussichtspunkt erreicht und de Usblick über Nong Khiaw gnosse. D Lea seit zwar immerno dasses gar kei Spass gmacht hett (es isch seeehr astrengend gsi) aber trotzdem isch sie jetzt stolz uf sich 😊.

    En Schwizer, de Sebastian, hämmer no atroffe, ihm ghört s Resti wo mir zNacht gesse hend. Flotte Typ, deht holemer eus no paar Tipps.

    Morn gahts nochli meh is Hinterland, uf Muang Ngoy. Silvester wärdet mir sehr ruhig verbringe.    Läs mer

    Se översättning
  • NiLe entdeckt d Wält

    Muang Ngoy

    31 december 2019, Laos ⋅ ☀️ 24 °C

    S‘chline Dörfli, Muang Ngoy, isch nur mitem Boot erreichbar. Es hett kei richtigi Strasse und au kei Autos. Die Ihheimische lebet sozege vom Tourismus, wasmer au sofort gmerkt hett. Vieli Restaurants und Lüüt wo ihri Sache wend verchaufe. S Wetter isch leider au nöd so guet, s isch echli wie ih de Schwizerberge. Näblig, chüehl und nass.
    Euses Bungalow hett e gmüetlichi Hängematte zum relaxe, aber das wärs au scho gsi. Pris-Leistig stimmt dasmal leider nöd.. mir hend trotzdem s beste drus gmacht, fein go esse, spaziere und chli gläse.

    Mir freuet eus waaaaahnsinnig uf de Süde und versuechet mal amene Ort es paar Nächt zbliebe.

    Drum händ mir eus ganz spontan für de Nachtbus (sleepingbus) entschiede und wärdet neujahr imene stinkende und änge Bus verbringe. Hoffentli chönd mir am Morge am 3:00 Uhr im Hostel ichecke, suscht luegemer mal wos eus hitribt 😁.

    Next stop: Vang Vieng

    Happy new year, fiiret alli schön! 🎉    Läs mer

    Se översättning
  • NiLe entdeckt d Wält

    Vang vieng

    2 januari 2020, Laos ⋅ ☀️ 31 °C

    Vang vieng, de Partyort vo Laos. Da chamer alles mache, s isch fast scho es chlises Märliland ;). Tubing, Heissluftballonflüge, rafting, kajaking, Party, buggy fahre, Höhle und Lagune erchunde und no vieles meh.
    Mir zwei, sind imene richtig tolle Hostel gsi und hend paar ganz gueti Östricher und Schwizer kenneglernt.
    Bim tubing (böötle mit Reife), händ mir 3h ufem Nam song Fluss verbracht. Au d Landschaft mit de Hügel isch wunderschön.
    Aber vorallem hemmer (oder hett d Nives) versuecht all die Oreos abztrainiere 🙃.
    Entspannti und schöni Täg in Vang vieng gönd z änd, mir hends richtig gnosse da☺️.

    Churze Stop in Vientiane, de Hauptstadt vo Laos und denn flügemer am Sunntig uf Pakse, in Süde vo Laos. 🌞    Läs mer

    Se översättning
  • NiLe entdeckt d Wält

    Vientiane und Pakse

    5 januari 2020, Laos ⋅ ☀️ 30 °C

    S‘big city life in Vientiane.
    Nöd all zu viel hämmer gmacht, eusi Reis chli planet und d Ziit imene wunderbare Hostel verbracht.
    De Propellerflüger hett eus in Süde gfloge, nach 1.5h simmer guet in Pakse glandet. ☺️
    Pakse hemmer au so schnell wie möglich wieder welle verlah und drum au grad am nögste Tag en Bus uf Dom Khome buecht.
    Uf d 4000 Islands freuemer eus riesig☀️    Läs mer

    Se översättning
  • NiLe entdeckt d Wält

    4000 Islands

    9 januari 2020, Laos ⋅ ☀️ 24 °C

    Die letste 3 Täg händ mir Don Khone und Don Det erchundet. D Insle sind ganz im Süde vo Laos, umgebe vom Mekong, grad bi de Grenzi zu Kambodscha. Mitem Velo simmer dur die steinige, löchrige und sandige Strasse gfahre was zimli astrengend gsi isch aber s abchüele im klare Mekong und die wunderschöni Natur hett sofort alles wieder guet gmacht 🥵😁.

    Die Ihheimische sind sehr fründlich und lieb gsi. Jede Tag hemmer d Chind beobachtet wie‘s vo de Schuel hei sind oder im Mekong nach Schnegge gsuecht hend.

    Am letste Abig hetts no en spontane Tee-treff mit de zwei Östrricherinne geh, wo mir in Vang Vieng kenneglernt hend. ☕️

    Spontan hemmer eus Entschiede dassmer als nögsts uf Kambodscha gönd. Mitem Tuktuk zu de Grenzi und em Minivan uf Siem Reap. 🚎    Läs mer

    Se översättning
  • NiLe entdeckt d Wält
    2

    Siem Reap

    11 januari 2020, Kambodja ⋅ ⛅ 30 °C

    Siem Reap, d Stadt mit em berüehmte Tempel Angkor Wat, hät eus sofort in Bann zoge. Die viele Night-Market, feine Restis, Massagestüblis und natürlich d Tempel hend eus bsunders guet gfalle.

    Die 67.- Ihtritt pro Person für en 3-Tagespass zum d Tempel erchunde hend sich definitiv glohnt! Sehr ihdrücklich wie die Iheimische Tempel für Tempel wieder ufbouet und so au vieli Arbetsplätz schaffet. Wänmer mit em Tuktuk richtig Tempelihgang fahrt, hettmer s Gfühl, mer fahrt ines fremds Land. Wunderschön!
    Doch d‘Hitz isch geg de Mittag unerträglich worde und d abchüehlig im pool hemmer eus verdient.

    Am dritte Tag hemmer eus 3h mit Massage verwöhne lah und sind nochli dur d‘Stadt gschlenderet.
    Jetzt dänn, fahremer mitem Nightbus, 14h richtig Koh Rong, ändlich as Meer...☀️    Läs mer

    Se översättning
  • NiLe entdeckt d Wält

    Koh Rong & Koh Rong Samloem

    18 januari 2020, Kambodja ⋅ ⛅ 28 °C

    Nacheme Monet dur Dörfer und Städt reise simmer endlich ufere Insle in Kambodscha acho. De Nachtbus und die aschlüssendi Bootsfahrt hend sich sehr i d längi zoge, nach 19h hämmers aber doch no gschafft. 😁
    D’Koh Rong Insle hett de Party-Insle ruef, doch mir hend am Long Beach, sehr abglege, nur mit Boot oder 1.5h Dschungel walk erreichbar, es Hotel gfunde. Kilometerlange wisse Sandstrand und türkisfarbigs Meer. Entspannig puur! 🧘🏽‍♀️
    Nach 4 Nächt hetts eus die Rueh denn aber glanget und mir sind uf d Nachbersinsle Koh Rong Samloem. M‘Pai, s chline Fischerdörfli isch es absoluts Hippiedorf mit vielne Usstieger. Überall schmöckts nach Weed und fast niemert hett meh als es Badzüg ah. 🌱 Am Abig lauft doch s eint oder andere ih de Bars und am letste Abig simmer no mit de Alex vom Guesthouse ane Beachparty am wisse Sandstrand.
    Mittlerwile hemmer grad wieder e mehrstündigi Busfahrt hinder eus und mir sind zrug im Stadtläbe in Kampot 🏢. :)    Läs mer

    Se översättning
  • NiLe entdeckt d Wält

    Kampot und Kep

    21 januari 2020, Kambodja ⋅ ⛅ 33 °C

    3 Nächt in Kampot gönd langsam z‘End. S‘highlight vo dene Täg isch d Pfefferfarm und de Chräbsmäärt gsi. Sehr ihdrücklich wie de Belgier und sini französischi Frau die Pfefferplantage füehret. Sie hend es wunderschöns Plätzli gschaffet und vieli Iheimischi dörfet deht schaffe und glichzitig au wohne. I de Stadt hend sie e Schuel eröffnet und d Chind chönd jederzit uf d Farm cho und Englisch lehre. :)

    De Chräbsmäärt isch leider au chli Tierliquälerei gsi.. trotzdem, es „must see“ in Kep!

    De Nögsti churzi Stop isch d Hauptstadt phnom Penh. 😊    Läs mer

  • NiLe entdeckt d Wält

    Phnom Penh

    22 januari 2020, Kambodja ⋅ ☀️ 33 °C

    Gmüetlich entspannemer no die letste Minute i de Lobby vom Hostel bis mir e langi Busreis nach Bangkok händ. Plus (minus) 17h im local Sleepingbus.

    Eigentlich wäret mir ja scho z Thailand, hettet mir as Chinese-Neujahr denkt. Natürlich isch i de letste Täg alles usbuecht gsi. Drum händ mir au e Nacht in Phnom Penh verlängeret und hend am 1 Tag in Rueh die zwei Musee chöne besichtige.

    Au nachere Nacht drüber schlafe simmer immernochli bedrückt und trurig. Was in Kambodscha vo 1975-1979 passiert isch, isch sehr erschreckend! Massemord, die eigete Lüüt hend enand ermordet. Döt, wo vieli schlimmi Sache passiert sind, sind hüt die zwei Musee. Miteme Audio guide uf Dütsch chamer durelaufe und wird gnau informiert. Sehr spannend und glichzitig wahnsinnig trurig gsi.

    A eusem zweite Tag hemmer eus defür en Tag im Pool vomene Luxusresort gönnt. D Backpackers schlafet im 5.- Hostel und de Tag dur im Luxushotel chli im Pool am bädele - so laht sichs läbe.🌞🙂

    Da d’Lea am chränkele isch, hemmer eus entschiede 5 Nächt in Bangkok z verbringe demit sie richtig gsund wird für d Philippine.

    Bis bald, wieder Mal in Bangkok 🙂 🚍    Läs mer

    Se översättning
  • NiLe entdeckt d Wält

    Bangkok

    30 januari 2020, Thailand ⋅ ☀️ 33 °C

    Entspannt höcklemer wiedermal i de Lobby und wartet uf euses Taxi für an Flughafe.
    S Ireise uf Thailand isch alles anderi als entspannend gsi. Nachem Nachtbus mit sehr wenig Schlaf simmer am Zoll ines riese Gedränge cho. Tuusigi lüüt hend welle ihreise und die Agstellte sind komplett überforderet gsi. Au de bestechigsversuech für de „VIP“ Zoll hett nüt gnützt. Nach 3.5h, mit über 30 grad im Gedränge, hend denn doch no alli Europäer dörfe bimene seperate Schalter ihreise. Die letste 6h fahrt im Minivan sind defür wie im fluug vergange ->😴!

    Z‘Bangkok hemmer chöne abefahre und die viele Ihdrück vo de letste 1.5 Mönet verdaue. Mir hend usgschlafe, im pool badet und sind dur d Stadt gschlenderet. Fascht wie es Wucheend dihei ih de CH.

    Richtig erholt freuemer eus riesig uf d Philippine und sind gspannt uf die viele schöne Plätz womer bsuechet. D Warnstufe wegem Vulkan isch au bizli zrug gange, mir sind positiv ihgstellt und parat zum flüge ✈️ 😁.

    De erst Stop -> d’Trauminsle Siargao 🏝    Läs mer

    Se översättning
  • NiLe entdeckt d Wält

    Siargao

    5 februari 2020, Filippinerna ⋅ 🌧 26 °C

    D Shirley hemmer am Flughafe vo Bangkok ufgablet und sind direkt uf Cebu gfloge.😃
    Ab de erste Sekunde hett eus d Philippine verzaubert. Die wunderschöni Insle Siargao, isch grössteteils mit Palme übersäät und hett es Glasklars Meer. Witer usse im Meer chanmer Surfe und Kitesurfe, vorne chamer Bädele. Die erst 3 Nächt simmer bizli usserhalb gsi, imene wunerschöne Airbnb mitere sehr subere und pflegte Alag. Die andere 2 Nächt hemmer imene Hostel in General Luna, s gröste Dorf, verbracht.
    Will irgendwo im Meer en Taifun unterwegs isch hemmer ab und zue chli Rege und Wind gha.
    Was aber nöd witer gstört hett, wills trotzdem 30 Grad gsi isch. 🌴🌞

    Hüt flügemer uf Cebu, die zweit grössti Insle vo de Philippine.    Läs mer

    Se översättning
  • NiLe entdeckt d Wält

    Update Siargao

    5 februari 2020, Filippinerna ⋅ 🌧 26 °C

    Da de Flughafe nur uf Sicht flügt und mir hüt Wulche und Rege gha hend, sind alli Flüg gstriche worde. Nach 5h warte am Siargao Flughafe simmer jetzt wieder ufem Weg is Hostel. Morn am 3 i de Nacht fahremer an Hafe i de hoffnig dassmer es Ticket für d Fähri bechömet.

    We will see.... :) drucket d Duume für eus 😜✊    Läs mer

    Se översättning
  • NiLe entdeckt d Wält
    2

    Cebu, Moalboal

    8 februari 2020, Filippinerna ⋅ 🌧 26 °C

    Eigentlich wäremer 4 Nächt in Cebu, Moalboal, bliebe, aber da mir nöd hend chöne flüge hemmer mit de Fähri e Areis vo fast 2 Täg gha.
    Richtig müed simmer a eusem erste Tag acho und sind es bizeli enttüscht gsi vo dere Insle. S isch die zweit grössti ih de Philippine und das merktmer sehr guet. D Armuet isch gross, es hett viel Abfall und au d Lüüt sind anderst wie uf de chline paradiesische Insle Siargao.

    Zu all dem hetts am erste Tag in Ströme gregnet. Mir hend trotzdem d Insle erchundet und e Tour buechet für am zweite Tag.

    Mir sind go d Walhaie aluege in Oslob und uf d Sumilon Insle. D Walhaie muessmer am Morge früeh gseh, drum simmer am 4:00h los. Leider isches de Lea nöd bsunders guet gange und sie hett müesse am Strand bliebe. Ca. 30 Minute hemmer d Walhaie chöne beobachte. Wills e riesigi Touristeattraktion isch, düend d Lüüt d Walhaie füettere, demit Touris sie au uf sicher gsehnd. Eus hett das eher chli gstört... aber trotzdem isches überwältigend gsi sones riesigs Tier im Wasser zgseh.
    D Sumilon Insle isch is Wasser gheit, es hett leider nur gregnet.
    Am 11:00h simmer wieder zrug in Moalboal gsi und d Sunne hett sich au endlich blicke lah. Sofort s Schnorchelzüg packt und vom Strand us go schnorchle. En huufe Schildchröt und es paar Fisch hemmer gse und natürlich d Sunne gnosse demit eusi brüni wieder ufgfrüscht isch. 🌞

    Morn, oder bessergseit nacher, am 3:00h i de Nacht fahremer mitem Taxi ca 6h an Hafe zum s Boot nach Malapascua z verwütsche. Uf dere chline Insle macht d Lea und d Nives s Tauchusbildig (PADI Open water) und d Shirley gaht selber chli go tauche.

    Freuet eus sehr und sind gspannt wie s Tauche wird 🐟🐡.    Läs mer

    Se översättning
  • NiLe entdeckt d Wält

    Malapascua

    9 februari 2020, Filippinerna ⋅ ☁️ 28 °C

    D’Taucherinsle, Malapascua, isch berüehmt für s tauche mit Haie, bsunders mitem Treshershark. D Lea und d Nives hend sofort mitem erste Tauchkurs, Open water, agfange und nach 3.5 lehrriche und au astrengende Täg, simmer denn qualifizierti Open water Taucher worde.
    Wills d Nives so packt hett, isch sie mit de Shirley no 30m tüüf zu de Haie go tauche. 🦈
    En Spaziergang as andere Endi vo de Insle isch au ganz gmüetlich gsi ;). D Insle isch au nur 2.5km lang und 800m breit.
    Wills eus da so guet gfallt hemmr 6 Nächt da verbracht und no en Ufslug uf Kalanggamman Insle gmacht (lueg im nögste Post:)).
    Morn gahts witer nach Coron, dasmal hoffentlich mitem Flüger 😁    Läs mer

    Se översättning
  • NiLe entdeckt d Wält

    Coron

    15 februari 2020, Filippinerna ⋅ ⛅ 25 °C

    Die letste drü Täg hemmer hauptsächli ufem Boot verbracht. D Isnle, Coron, hett nöd würklich schöni Stränd und au nöd viel Sehenswürdigkeite, d highlights befindet sich rund um d Insle ufem Meer usse. Korralleriff, türkisfarbigs Meer, Lagune und d’Stei wo usem Wasser raget. Da hemmer eus guet chöne beschäftige :).

    Gester, a eusem letste Abig in Coron, hemmer de Lea ihres Geburtstagsesse vorgholt. Ihre Wunsch isch gsi, d Glüehwürmli ih de Mangrove go zbeobachte und ufem floatingresti zNacht esse. Vom chline Boot us hend im Wasser d Plankton glüchtet, am Himmel d Sterne und ih de Mangrove d Glüehwürmli. Wunderschön, romantisch gsi! ☺️

    Langsam hemmer s Philippinsche Esse chli satt, kulinarisch sinds leider gar nöd guet unterwegs. Riis und Fleisch, isch öbe alles wo die esset und für eus zwei Vegis nöd grad abwechsligsrich. Janu, trotzdem gnüssemers richtig fest. 🌞
    Mir hend no 8 witeri Täg vor eus, nacher isch de Monet leider au scho wieder ume und mir flüget richtig Singapur.    Läs mer

    Se översättning
  • NiLe entdeckt d Wält

    El Nido und Port Barton

    19 februari 2020, Filippinerna ⋅ ☀️ 26 °C

    Da mir die letste paar Täg sozege kei Internet gha hend, hemmer grad zwei Ihträg für eu.

    In El Nido, hemmer es farbigs Hüsli am berüehmte Nacpan Beach gha. De Strand isch anschienend s „little Boracay“. 4 Kilometer fine, wisse Sandstrand und türkis Meer. Leider aber viel z grossi Wälle für euse Gschmack und au sehr viel Qualle. Drum hemmer eus für en Tagestrip entschiede. Aber, de isch au nöd Lohnenswert gsi und drum gömmer hüt, Dunstig, witer richtig Port Barton.

    Port Barton, chömer grad auno da ih de Text neh ;). Eigentlich wäremer 3 Nächt im „Prince John“ Hotel gsi, händ eus aber churzfristig entschiede zum hüt ah de Lea ihrem Geburtstag uf Puerto Princesa z reise. Vo deht us gaht denn au euse Flug am 26.2 nach Manila. Am Abig gömmer denn no es biz go de Geburtstag fiire 😁
    HAPPY BIRTHDAY LEA🎊🎊🎊🎉    Läs mer

    Se översättning
  • NiLe entdeckt d Wält

    Puerto Princesa

    24 februari 2020, Filippinerna ⋅ ⛅ 28 °C

    Im Verglich zu dene chline Dörfli wo mir ih de letste Zit ih de Philippine gseh hend, isch Puerto Princesa ä recht grossi „Stadt“.
    De Flughafe isch z‘mitzt im Zentrum und d Flüger flüget eus täglich über de Chopf. Fast so, wie ih eusem dihei in Oberglatt ☺️.
    Kulturells hett Puerto Princesa nöd viel z büte und au was s Meer agaht, hetts nüt würklich schöns. Abgseh vonere Krokodilfarm wo mir aber nöd hend welle go aluege.
    Eusi letste Täg ih de Philippine und mit de Shirley hemmer vorallem ih eusem chline, aber sehr gmüetliche Hotel verbracht und sind dur d Stadt gschlenderet.
    Scho uf eusem erste Spaziergang sind eus d Blick ufgfalle vo de Iheimische. Überall werdemer agstarrt und aglächlet. Ah de schöne Promenade simmer au mehrfach vo junge Teenies fotografiert worde und ab und zue hett sich au öber getraut zum fröge ob er es Foti mit eus dörf. Die chline Chinde hend de Lea ihri helli Huut bsunders gern agluegt oder aglangt ;).
    Mittlerwile höcklemer grad am Flughafe in Manila und d Lea und ich wartet uf euse Flug uf Singapur, d Shirley verabschiedemer und wünschet en guete und sichere heiflug über Hongkong ih d Schwiz.
    Schön isches gsi mit dir😃😍🌴!    Läs mer

  • 2026© FindPenguins
  • Hem
  • Om oss
  • Spåra gruppen
  • Press
  • Villkor
  • Integritet & Cookies
  • Hjälpcenter
  • Avtryck