Vo Stavanger zum Eidfjord

Am 6. August simmer uf Stavanger gange. S het eus sehr gfalle, mer hend es paar second hand läde gfunde und e sehr feini pizza gesse ide øvre holmegate und dete au no en kafi trunke und es stuck chueche gesse. Die wisse hüser ide Altstadt hemmer natürlich au ahgluegt und sind denn wieder zum Auto zrugg. Wills nonig eso spat gsi isch, hemmer eus entschlosse, no dt Wanderig zum Preikestolen z mache. Eigentlich hemmer gmeint, s gech 1 stund hii und 1 stund zrugg (was auscho glangt hetti, mer sind am 5i fengs abgloffe). S het sich denn aber usegstellt, das die ahgäne 2 stund nöd insgesamt gmeint gsi sind, sondern pro weg. Mer hend eus de ganz weg druff gfreut, das mer dobe denn defür vlt nöd eso vill lüt ahtreffed, wills ebe scho eher spat gsi isch. Bim Stei acho simmer leider chli enttüscht worde; mer sind zwar fasch elei gsi, aber es het so vill nebel gha, das de erwarteti blick ufde Fjord under eus usblibe isch. Aber söll keine sege, s heg sich nöd glohnt, dt wanderig isch ahstrengend aber sehr schön gsi, und ufem weg hemmer au es paar blick uf de Fjord chöne erhasche und es paar herzigi bergseeli bestuune. Bim Auto wieder acho simmer denn ufen stellplatz gfahre und hend znacht kochet (Tomaterisotto).
Am nögste Tag simmer wiiter gfahre richtig Røldal. Ufem weg simmer amene „Lachsstudio“ verbi cho, womer hätt chöne zueluege, wie dt Fisch ufere Fischstege de Suldaslågen ufe „chlettered“. Es bitzli wiiter de Fluss entlang hets denn Fischerpause für de Alain gäh (er isch sehr begeisteret gsi nachdem mer sovill fisch gse hend) und ich ha im warme echli gläse. Mer sind wiiter gfahre und schliesslich in Røldal ufem Campingplatz acho. Nachem Znacht (Pasta mit Pesto) simmer no zude Chile spaziert und dank em chline wettrenne ufem Rückweg han au ich wieder warmi füess gha.
Hütt morge simmer beidi go dusche und hend die am vorige abig gwäschni und ufghänkti wösch iipackt. De alain het mich überzüügt, es ründeli im Fluss go fische. Ich has zwar no schön gfunde, aber dt begeisterig fehlt mer mangels gefangener fische nochli. Vlt klappts ja die Ferie no. Ufem rückwäg hätt de alain die grandiosi idee gha, statt alles wieder em fluss entlang zrugg z laufe, über dt brugg und wieder zum auto zrugg, doch eifach dur de fluss dure laufe, er gseht ja wük gar nöd tüüf us (ich gibe zue, er het wük nöd tüüf usgseh). Lektion gelernt; Schlussendlich simmer beidi bis zum buch (ja, inklusive underhose) nass gsi, und obwohl s sünneli chli zwüsched de wulche dure gschune het, ischs für das bewiitem nöd warm gnueg gsi. Schnell simmer zum Auto zrugg eus go umzie. takeaway a dere sach, flüss sind dopplet so tüüf, wies usgsehnd, und eifach nie ufde Länggi lose bi so sache.
Womer beidi wieder trocheni chleider ah gha hend, simmer go poschte und denn abgfahre richtig Eidfjord. Unterwegs hemmer scho 3 sehr iidrücklichi Wasserfäll gsee. Bim Camping bim Eidfjord acho simmer denn no gschwind en 4te und 5te go aluege. Denn hemmer gesse (curry mit riis) und jetzt sitzemer ufem steg im see und gnüssed de schöni usblick (musch ebe gnüsse, solangs schön wetter isch).Read more