Eidfjord bis Bergen

Nach ere erholsame nacht simmer am 9. leider zu nöd eso goldigem wetter ufgwacht. Eigentlich hemmer welle go wandere, aber bi Rege und Nebel hemmer nöd wieder welle de glich fehler mache wie bim Preikestolen (dut immerno weh). De Reisefüerer het aber zum Glück en guete Tipp gha für Regentage und drum simmer is Norsk Natursenter Hardanger, wo mer vill glernt hend über Flora und Fauna in Norwege. Im Panoramakino hemmer no en sehr iidrückliche, wenn au sehr alte Film gluegt, wo enart en Helikopterflug dur verschiedeni Fjords und Landschafte in Norwege zeigt het. Nebed em Museum hets denn Fish & Chips geh im Resti und mer sind gstärkt zu eusem nögste Ziil abgfahre. Unterwegs hemmer wieder mal en Wasserfall gse, sind ufes herzigs dörfli gstosse und hend imene (ebefalls vom Reisefüerer empfohlene) Kafi es stuck chueche gässe (ich glaub mir rugeled am schluss zrugg id schwiiz😋). Schliesslich simmer bi eusem Rastplatz fürd Nacht acho und hend eus gad no s letschte Plätzli ergatteret. Mer hend Znacht kocht (Zimmlich spezielli Älplermakkrone, mit Broccoli, Tofu und ere Norwegische Chäsmischig, isch fein gsi aber öb mer das no cha als Älplermakkrone bezeichne…🤷🏼‍♀️) und de alain het nochli gfischt. Am nögste morge isch de alain leider mit sehr starche Nackeschmerze ufgwacht, a was es glege het wüssemer leider au nöd genau. Mer sind uf Bergen gfahre und hend s schöne Städtli trotz schmerze und mit hilf vo schmerzmittel chöne gnüsse. Mer sind dur Brygge gloffe, hend schöni hüser und de Hafe ahgluegt und sind mit ere seilbahn uf de Huusberg vo Bergen ufe, womer schön uf die ganz Stadt abe gse hend. Am Abig simmer ine Pizzeria go znacht esse und de alain het für de nögst morge gad no en Naprapati behandlig gfunde (norwegischi ostheopathie) und en termin abgmacht. Mer sind zrugg uf euse Rastplatz, bis jetzt de unschönsti und ungmüetlichsti (drum hemmer au zum erste mal usswärts znacht gesse). Bergen = nöd eso camperfründlich. S isch drum au die schlechtist Nacht gsi bis jetzt, gstört vo dene nebedra wo bis öppe am 1 no huere lut hend müse schwätze, em hafe nebedra wo immer wieder grossi schiff ii und uus sind, de strass nebedra und em unregelmässige rege plus vercheer ide strass nebedra. Am morge hemmer gschnell zemepclt und sind idt stadt für am alain sini nackebehandlig. Parkplatz suechi isch wiedermal ned ganz eifach gsi. Wommer den eine gfunde hend han ich mir zur belohnig en zimt schnegg und kafi gönnt. Am alain sini behandlig isch guet gloffe und mer sind positiv gstimmt. glichzitig isch luut de Frau wo ihn behandlet het de Summer in Norwege de schlechtischti sit 60 Jahr rege technisch. Super ussicht. Jetzt schinz aber schowieder s süneli und mer mached eus uf de weg zum nögste ziil.Read more