Kandy

D Fahrt vo Ella uf Kandy isch mega mega schön gsi und mir hend immer mal wieder aghalte, sind usgstiege und hend die schöni Landschaft bestuuned. Am nöchste Morge het's e Stadttour in Kandy ge. Es het grundsätzlich mega cool agfange. Mir sind zerst bimne Tempel und bi de Buddah Statue verbi. Vo det us hemmer gseh wie es paar Männer Ross am Longiere sind (het chli lustig usgse, will sie en viel zu kurze Strick gha hend und darum die ganz Ziit de Ross hinedri gsecklet sind). Mir zwei als passionierti Rössli-Meitli hend det natürli müsse go verbi luege. Es het sich usegstellt, dass das die verletzte Polizeiross vo Kandy sind, wo grad Pause vom Dienst hend und sich erholed. D Poliziste hend voll Freud gha, dass es eus interessiert het und es isch en mega cooli Begegnig gsi. Es isch wiiter gange in en Herbal-Garte für Ayurveda Medizin. Grundsätzlich spannend, aber dete isch es denn schnell mal nur no drum gange eus möglichst viel z verkaufe. S gliich bim Edelstei-Museum und bim Holzschnittsmuseum. Es isch alles eigentlich sehr spannend gsi, was sie so verzellt hend, aber nachene hend's eus eifach für viel zu viel Geld irgenwas welle adreihe, was chli unangnehm gsi isch. Am Namitag simmer denn wiiter uf Kalpitiya, wo mer jetzt paar entspannti Täg am Spot zum Kite verbringed Czytaj więcej