Saguaro National Park

Mer händ entschlosse phoenix spöter no einisch azpeile ond send wiiter afahre rechtig tucson. Das esch chli wiiter südlich ond drom es bitzli wärmer. Mer händ ufme chliine camping grad näbem nationalpark es plätzli gfunde. Gfüehrt werd das vomne alte babeli ond sinere frau. So wies usgsehd wohned die meiste lüüt fest da. Womer acho sind esch er ganz usem hüüsli gsi wells am morge schnee gha heig, das händ sie no nie gseh da....aso doch au nonig so warm wies sött si 😅🙈 mer send a dem erste tag is visitor center vom nationalpark ond händ üs über wanderroute före nächst tag informiert ond e film gluegt wo üs de campingtyp empfohle hed. De nationalpark esch bekannt för sini riesekaktee (saguara). Nachär hed de erich es chnoblisöösseli gmacht ond mer händ ade sunne gaperöled ond spiili gspielt. Als abschluss hämmer no uf de terasse (wo de bsitzer uf sis office hüüsli druf bout hed) de sunneuntergang gluegt.
Am nächste morge ben ich ganz früeh ufgstande zum uf de besagte terasse au no de sunneufgang z gnüsse. Aschlüssend hämmer üs ready gmacht ond send weder i nationalpark gfahre. De erich hed d wanderig usgsuecht...es esch aber sehr e langi gsi was mich erstuunt hed. Er hed wohl im chopf eher mit kilometer grächnet als mit meile... Zerst simmer lang dur kakteefälder ond felse gloffe, aschlüssend esches bärg uf gange. D ussicht esch immer spektakulärer worde. Mer send es stöck ufem grat gwanderet ond denn zum höchste gipfel vom park cho. Det hämmer d ussicht gnosse ond ganz schwiizerisch üses sandwich gässe 😅 aschlüssend eschs hindedrah weder imne boge abegange ond so simmer nach 5 stund weder zrug bim camper gsi. De namittag hämmer de weder mit spiili a de sunne gnosse, ich ha sogar echli sunnebrand im gsicht 🤭 zum znacht heds weder mal spaghetti gä ond denn simmer früeh ond kaputt is bett.Weiterlesen