Cottonwood

2 nächt hämmer in cottonwood verbracht. D fahrt det äne esch scho spektakulär gsi 😍 mer send dur de coconino national forest gfahre, eifach unglaublich tolli ussicht! De erich hed s wohnmobil souverän um all die kurve gstüüred ond ich ha usem auto use gföteled was das zeug hält 😅 denn simmer durs dörfli sedona gfahre. Da hettemer eigentlich welle ahalte, hend üs de aber degäge entschiede wells soooo öberloffe gsi esch, hed scho rechtig stau gha vo desere richtig is dorf ine 🙈 mer send denn also wiiter gfahre ond händ denn es schild gseh för de red rocks state park. Also simmer spontan det hi. Es esch e gueti entscheidig gsi. E chline park mit toller ussicht ond ganz villne churze wanderwäg dur d natur. Mer send det chli dure gspaziert ond händ nachm früehlig usschau ghalte... oke, sorry erich, ich meine natürlich, mer send dure gwandered, mer send ja me als e stund unterwägs gsi ond das esch ja logischerwiis die universelli gränze zwüsche spaziere ond wandere 😜
Nachär simmer zu üsem campingplatz för die erst nacht gfahre ond send det no im hot tub ghocked ond händ chli met de lüüt plaudered (wie du gsehsch karin, semmer scho fliisig am üebe för üche hot tub 🤭).
Am nächste morge esch ostersunntig gsi 🐣🐇 nachdem ich zerst chli telefoniert ha hämmer en chliine osterbrunch a la wohnmobil gmacht! Denn simmer uf jerome gfahre. Det heds e ghost town gha womer händ welle go aluege. Es dorf, wo früehner miine arbeiter gläbt hend ond jetzt esches wie e art museum. Es esch no spannend gsi aber au sehr vollgstopft. Anschiinend händ sichs die lüüt, wo das betriibed, zur läbensufgab gmacht, jedes alte auto ond jedi kaputt maschine wos chönnd uftriibe det ine z quetsche 😅 mer send denn au no chli durs hüttige jerome spaziert (dasmal werklich nor spaziert) ond aschlüssend zum campingplatz gfahre. Womer acho send esch grad üsi nachberi zu üs cho ond hed gseid, es gäbi 10 minute z fuess vo da es wiiguet wo wine tastings abieted. Aso simmer grad, zägg, weder los gloffe. Mer händ denn det au die nachbere vom zältplatz weder troffe ond met dene chli gspröchled ond wii probiert. S coolste han ich gfunde, dass sie eim zum wii gfrorni trube als "iswürfel" serviered, damit de wii chalt bliibt aber ned wässrig werd 🤯
Weder zrug ufem campingplatz hämmer no die letschte sunnestrahle verusse gnosse. Womer afa d stärne bestuune händ esch scho weder de nachber cho ond hed üs no zu ihne ufe platz iglade. So hämmer no e rechtig lustige obig verbracht 😊Baca lagi