Grand Canyon

Äääändlich esch es so wiit gsi, ond mer händ i grand canyon nationalpark chönne ga 😍
Mer händ vill drüber gläse ond ghört, dass es vorem süd igang schnell stau gid ond d parkplätz dinne scho rächt früeh alli bsetzt send. So sind mer schlaue füchs zum ost igang gfahre ond händ öpe 5 meile vorem igang näb de strass imne wäldli campt. Das esch nomol so es rechtig schöns erläbnis gsi! Mer händ am nami chli d sunne gnosse, am abig es füür gmacht ond znacht brötled ond wo s füür langsam usgange esch no chli id stärne gluegt...allerdings ned all zu lang. So ohni füür sind eim de die nor wenige grad überem 0 punkt nöm so gmüetlich vorcho 🤭 am nächste morge simmer früeh uf ond losgfahre ond send am 8i ohni stau i nationalpark cho 😊 mer händ grad am erste ussichtspunkt ghalte ond send usem stuune chum me use cho. De canyon esch werklich giiiigantisch. Ond es esch so idrücklich, wie mer die verschiedene gesteisschichte gsehd ond amigs ganz chli, ganz wiit unne de fluss. Mer send de aschlüssend zum visitor center gfahre wos en wohnwageparkplatz gha hed ond händ det am 10 ab 9ni eine vo de letschte parkplätz ergattered 🙈nachär simmer los gwanderet, alles de kante entlang. Unterwägs hämmer immer wieder ghalte zum fötele, öpis trinke (mit de sunne esches sehr schnell rechtig heiss worde) oder eifach d ussicht gnüsse. Einisch hämmer sogar üsi nachbere vom letschte campingplatz atroffe 😅 neumet hämmer de au no es zmittag picknickt (räste riissalat vom znacht gester) ond so simmer fast 9 kilometer hindere gwanderet, bis mer de i dere hitz langsam dure gsi send. Mer händ de gratis shuttlebus gno, zum no ganz as westlichste ändi z fahre ond send det no chli ume gloffe, denn hämmer mitem bus zrug welle. Nor blöd, dass das mittlerwiile alli händ welle 😅🙈 metem erste bus simmer bes a rand vom grand canyon village cho, d büs zrug zum visitor center send aber soooo vollgstopft gsi, dass mer a jedere haltestell öpe en stund hätt müesse warte. Also semmer denn die 3.5 kilometer au no gloffe. Das esch de weniger lustig gsi i de hitz ond mit inzwüsche lääre fläsche. Zum glück simmer ufem wäg am ne lade verbi cho, womer üs zur stärkig en istee gönnt händ. Zrug bim visitot center hämmer zerst mol ufem vollkomme überfüllte parkplatz üses wohnmobil müesse sueche 🤭 i de zwüscheziit send uf jedem parkplatz mindestens 2 wohnmobil gstande ond dezwüsche chrüüz ond quer autos 🙈 mer händs de gfunde ond use gschafft ond send denn schnuer straks zu üsem campingplatz gfahre. Det hämmer dusched ond als stärkig nach dem lange tag zum znacht en lasagne gmacht 🤤Read more