Banff - Jasper

De Tag höt hed früehner agfange als söscht, mer händ nämlich e wiite wäg vor üs gha ond underwägs vill welle gseh (aso ja, desi 4, ich dörf ja amig s wohnmobil bewache... Was ben ich eigentlich, e wachhund...). So esches nach ere duschi ond me zmorge au scho gli los uf lake louise. Scho uf de autobahn heds tafele gha, de parkplatz sigi voll. Mer händ de im dorf unne hinder ere tankstell no en halblegale ergattered, händ denn aber müesse feststelle, dass mer d büs zum see ufe hät müesse vorreserviere ond för höt alles usbuecht esch. Heieiei massetourismus ahoi. Mer händ üs de schöni see aber ned welle la entgah ond händ üs churzerhand entschlosse, zum see z wandere. E stund bärguf bi 30 grad, zum glück esches e schöne wäg dure wald gsi. Nor de bärespray esch dummerwiis bi mer im wohnmobil blibe, irgendwie hend all gmeint mer mües de strass entlang ufelaufe 🤷🏼‍♀️ naja, de bi wenigstens ich definitiv in sicherheit gsi 😅
Mer hend denn uf dem wäg vill schöni natur ond kei bäre gseh, för de überfüllti ort simmer uf dem wanderwäg au relativ elei gsi aber mer send scho so all 20 minute weder anderne lüüt begägnet oder hend d strass gchrüzt, glaub ned so das wo bäre geil findet... Dobe acho hemmer de schön see bewunderet ond hend chli d füess badet. Hed also ganz anderst usgseh als wo de erich ond d larissa s letschte mal im schnee da gsi send.
Als nächsts simmer wiiter zum peyto lake gfahre. De esch bekannt för sini wunderschöni farb ond au de esch bim letschte bsuech vo erich ond larissa zuegfroore gsi. Höt hed mer aber die rechtig kitschigi farb dörffe bestune 😍.
Chum simmer über d gränze zum jasper nationalpark hed de marco scho e vollbräms änegleit: 2 bäre am strasserand. D euphorie esch gross gsi ond d birgit hed grad s muggegitter vom fänster abgrisse zum besser usegseh, ups 😅
In jasper acho simmer go poste ond händ denn es feins znacht gchochet. De hockemer da all so gmüetlich am ässe ond plötzlich, zägg, stad e riesegrosse elk vor üs, das esch uf dütsch e hirsch (nor liecht verwirrend). Es sind denn au no mehreri verbiizottled ond händ chli grased, sogar es mami mit me baby. Alli sind nüm usem stuune usecho, es hed sich also definitiv glohnt so wiit id natur usezfahre.
Jetzt gheied alli müed is bett ond träumed vo bäre, hirsche ond schöne seeä. 🥰Læs mere