Canada 2024 🍁🇨🇦❤️

Als nächsts uf üsem programm esch de Larissa ehres gschänk ufe 30.geburi gstande: e surftripp uf vancouver island, gnauer gseid is surferörtli tofino.
Z vancouver am flughafe simmer üses auto go i empfang nä ond denn esches los gange uf d fähri. Uf vancouver island acho hemmer aber no 3h müesse fahre bes mer z tofino acho send. Mer send unterwägs no go poste ond bes mer de det gsi send esch scho 7ni gsi, so hemmer no chli gaperöled ond zum znacht hemmer üs feini burger gmacht.
S wätter hed natürli passend zu somne surftripp grad umgschlage ond s esch no 15 grad gsi ond hed immer weder grägnet 😅🙈
Vo dem hämmer üs die guet luune aber ned lo verdärber ond mer send am nächste tag go tofino erkunde. S esch werkli es härzigs chliises städtli met huufe chliine lädeli, kaffees ond restaurants (ond komischerwiis nor einere einzige bar 🤷🏼‍♀️). Es esch grad no e märt gsi ond ufere grosse liinwand hends det die olympische spiil übertreid (surfe natürli 😏).
Aschlüssend simmer no e strand i de nöchi go aluege ond händ denn imme resti am strand öpis chliises welle go ässe... Hoppla, das resti ghört zumne noble hotel ond esch glaub s chicste im ganze örtli 🤭 s ässe esch uf jede fall fein gsi ond öber d rächnig redemer jetzt ned 😜😅
Am obig simmer mitem gratis shuttle bus ines resti go znacht ässe ond händ üs paar cocktails gönnt (alles gschänk ad larissa wo natürlich müend iglöst wärde).
För de nächsti morge hemmer en whalewatching tour bueched. Mer händ am 8i müesse det si ond sind denn i so chici roti azüg quetscht worde. So hemmer immerhin warm gha ond denn esches för 3 stund mit me gummiboot mit motor use ufs wasser go tier aluege. Mer hend ganz vill verschiednigs gseh, seehünd, diversi vögel, seelöwe, otter ond natürlich grauwal. Aso vo de wal gsehd mer ja ned so vill, die send ja unter wasser, halt eifach amigs d fontäne ond d flosse wenns abtauchid. Eis sig schiins es mami mit baby gsi wie üse guide a de fontäne erkännt hed. Es esch sehr idrücklich gsi ond mer händ glehrt: wal-athem stinkt grässlich 😅
Aschlüssed hemmer de doch rächt chalt gha ond hend üs drum es warm kaffi ond öpis zmittag gholt.
Am namittag hend d larissa ond de erich trotz nieselräge ond tüüfe temperature gfunde, sie müend jetzt go probiere wie d wälle da send. Also sind sie sich go brätter ond dicki neoprenazüg miete ond ab die post. Es hed rächt vill lüüt gha ond d wälle sind ziemli chli gsi, somit sind d erwartige ned grad gross gsi a de surf aber siehe da: beidi hend no sälte so geili wälle verwütscht 😍 d wälle esch mega clean gloffe (aso ned so verwindet ond undefiniert gsi) ond die beide hend jetzt eifach so guet wie jedi verwütscht wos apaddled hend. Nach über 2 stund (ond mindestens 20 wälle pro nase) hend sie denn d brätter weder müesse zrugbringe ond sind hei. D birgit, de goldschatz, hed dehei scho afa spaghetti choche ond so händ die 2 hungrige, duregfroorne surfer nor no dörffe änehocke ond gnüsse 🥰
De obig hemmer de ufm sofa mit popcorn ond surffilm verbracht.
Am nächste morge hemmer en surflehrer buecht. Mer send weder a gliich strand wie gester, dbedingige send aber leider nöm ganz gliich optimal gsi. S hed zwar ähnlich usgseh aber d wälle hed nöm gliich vill chraft gha ond drum esches schwieriger gsi sie z verwütsche. De möchte-gärn-surf-profi larissa hed gmeint es chönnti dra ligge, dass jetzt langsam eppe wird onds gester gäg d fluet zuegange esch aber es spielt ja eigentlich au kei rolle, spass hend uf jede fall alli gha 🤙🏻🏄
De letscht nami hemmer no gmüetlich i dem dörfli verbracht ond am obig hemmer nomol gmüetlich e film gluegt dehei, was wotsch au anders bi dem wätter 😅
Peace out
Flat EricRead more