Okotoks

Die letschte paar täg vo üsere reis hemmer nomal z okotoks bi de karin verbracht. Ich ha mich schön gfreut min BBF de cody weder z gseh!
Mer send am friitig mittag glandet, sie esch üs vom flughafe cho abhole ond denn hemmer zerst mal e gmüetliche nami mit pöstele, mitm cody go spaziere ond aperöle verbracht. Nachär heds för d mänsche pilzrisotto gä ond för mich e pilz, ich ha nämlich ned so gärn riis.
Am samstig hend all mal chli usgschlafe ond denn simmer i de nöchi uf e farm womer cha gmües ond blueme chaufe, chli spaziere ond zmittag ässe 😋
Am nami simmer denn chli go pöstele ond es feins glace go ässe. Rechtig e geniale glacelade wo mer no alles mögliche züg i sis glace cha la driimische, alli hend sich gfreut wie chliini chind 🤭
Am obig hemmer de weder gmüetlich chli spiili gspielt ond de karin ehri fein vegi-bollonaise gässe 🤤
Am sunntig hemmer de ändlich no üse riit usflug nachegholt wo eigentlich för de ersti tag planed gsi wär, mer denn aber wägm annulierte flug hend müesse verschiebe. Anstatt de marco esch de halt d karin mitcho 😉 es hed allne werkli sehr vill spass gmacht ond esch e tolle abschluss vo dere reis gsi.
Weder zrug dehei sind alli koffere packt worde ond mer händ mit de karin ond am dave es feins abschiedsznacht gässe. Aschlüssend simmer früeh is bett well mer morn am 4.30h müend ufstah för a flughafe.
Peace out
Flat EricRead more