Tamarindo

Tag 4:
Jede Tag glingts üs besser met echli länger schlofe ond üs de Zit aklimatisiere. Höt hemmer also entsprechend echli "usgschlofe", no im Airbnb zmörgelet ond send denn los uf die 3-stöndigi Fahrt vo La Fortuna uf Tamarindo. Be dene Strosseverhältnis done ond dank 2,3 Onfäll uf de Strecki eschs de nomol bezz länger worde. Aber mer hend üs be gueter Musig bestens beschäftigt ond es Chäferfäscht gha i dem Charre. Nachem ichecke is neue Airbnb semmer direkt i Pool well es esch rechdig rechdig heiss done! Nachher alli go dusche ond ab a Strand! Ändlech Meer! Mer hend chli de Surfer zuegluegt, send de Strand abgloffe ond hend üs de Sonneontergang bemne Happy Hour Mojito agluegt. Nachher hemmer gfühlt 2h demet verbrocht es geeignets Restaurant z fende, wo alli öppis chönd schnabuliere (ned eifach met all üsne Vorliebe ond Veganer/inne im Boot). Ergendwenn hets afo rägne in Ströme ond s hed de mösse schnell go. Send de zom erschd beschde Asiat. S ged emmer heftiger afo rägne ond blitze, no schön gsi zom zuelose vom Scherme. S Ässe esch zwardenn au im donkle serviert worde und ufs WC hemmer au im fischtere (ond ohni WC Papier) müesse - aber es war lecker! Wieso? S Gwetter ond de starchi Räge hend zo Stromusfall im ganze Dorf gfüehrt. Entsprechend semmer denn nachem Ässe weder hei ond nömm witers.

Tag 5:
Au höt hemmer de Schlof usgnötzt ond gmüetlech deheime zmörgelet (Sparföchs). Denn hemmer s Wetterapp öberprüeft, wo gseid hed i 40min fods afo rägne ond blibt so de ganz Tag. Hend aber gfonde mer gönd etz trotzdem no die schöne Stränd go abfahre ond send los. Dör Schlamm ond Wassergräbe, a Äffli ond anderne Viechli (leider no emmer keis Fultier) verbi hemmers gfonde: 2 zemmli einsami aber wonderschöni Stränd! Playa Mina ond Playa Conchal. Cho rägne eschs ned aber trotzdem au ned sosooo schön gsi, emmer es Wölkli am Hemmel heds gha. Drom hed d Frau Steiner au gfonde neinei Sonnecreme bruchts höt ned. Jo...mer lehrt drus gäll (ech wohl ned). Ufem Heiweg heds no e chline Shopping Absacker gä (ond es Sonnebrand Groppeselfie). Zrogg ide Onterkonft hets no e Teller Spaghetti ond Sangria gä ond de semmer ab go s Tanzbei go schwenge ond Karaoke senge. So bezzli mimimi wegem Sonnebrand hets vo allne gä ond s After Sun esch guet in Gebruch gsi am Obe ond nomol vorem pfuse. Morn gods schoweder witer uf Samara, s Airbnb esch bueched ond mer send gspannt. 😁もっと詳しく