Costa Rica / Panama

Tag 1:
Völlig erschöpft vo üsem 12h Flog semmer metem Mietauto i üses Airbnb gfahre, es esch es Tiny House. Also wörkli tiny🤫😅 ond de Pool esch au meh e chli grösseri Badwanne, als öppis anders. Aber hey es hed völlig glänged ond esch sehr zentral gsi, top Lag för Usflög ide Omgebig! D Chochiusstattig esch ned de Hit; aber es hed emmerhin glänged för es paar Spaghetti mit Barbecue/ Chnoblipulver Sauce ond echli grebnigem Mozarella dröber (nedmol so guet gsi, wer hätts dänkt🤓). Nachher heds no es Phase 10🃏 gä, be Phase 7 hemmers de aber scho ufgä, mer send zuuu müed gsi ond vode Mogge semmer au ufgfrässe worde😩🦟

Tag 2:
Mer hend usgschlofe (heisst met Jetlag am 5i am Morge semmer wach gsi, ned wohr🙃). Zom Glöck hemmer üsi privati Yogalehrerin debi ond hend sportlech i Tag gstartet ond so chönne Zit öberbröcke. Well mer hend onbedengt welle ines Cafe ide Nöchi go zmörgele, wo aber erschd am 07.30 ufdo hed. Also semmer denn losgfahre ond wie Schwizer so send pönktlech 07.28 det uf de Matte gstande. Hed sech de usegstellt des es genau das Cafe gsi esch wo als einzigs völlig osserhalb vo La Fortuna vom Städtli lid ond esch ehrlechgseid etz au ned grad guet gsi. Esch sone One Woman Schuppe gsi, also die wo üs bedient ond ikassiert hed esch au die gsi wo koched hed ond sie hed emmer nor eis Omelettli uf einisch chönne mache ond brenge😅 de semmer zom Nationalpark Volcan Tenerio gfahre, wo de Weg scho es zemmlechs Abentür gsi esch. Det vor Ort hemmer denn welle Tickets löse för dä Park ond scho mösse die erschde Närvezämmebröch erlide. Mer hed nämmli ned chönne det vor Ort eifach es Ticket löse ond zahle: nei mer heds mösse online kaufe ond denn det no d Passnommere agä ond pipapo. Secher 25Minute hemmer probiert das Ticket löse ond scho faschd weder welle go. Jänu, s flueche hed sech glohnt. Ergendwenn heds klappet ond mer hend chönne inego. Zom lüchtend blaue Wasserfall ond de Lagune hemmer wit mösse laufe ond send bachnass acho, sogar 2x. Zerscht hemmer us jedere Drüse gschwetzt, denn semmer no verrägnet worde. Als Belohnig hemmer üs no en Pinã gegönnt ond paar Mangoschnitz. Am Obig semmer oswärts go ässe ond aber au do weder zemmli früeh hei ond gärn is Bett.

Tag 3:
Höt hemmer selber Zmorge gmachd; Avocadotoast, Rüehrei à la Aaron, Früchtesmoothie und au en Fruchtteller. Esch absolut lecker gsi ond hed üs Kraft gä för dä Tag. Anschliessend semmer los zom "Wanderwäg" för uf de chlineäi ehemalig Vulcan (Cerro Chato). Die Wanderig esch rond 5h gange ond garned ohne gsi. E werkleche Wäg esch das nämmli ned gsi; zwösche Steispalte, öber Worzle, Geröll ond Schlamm hemmer üs ufegwagt bes zom Ponkt womer ufe See abegseh hed wo sech früehner de Vulkan befonde hed ond etze en Krater esch. Det hätt mer au weder abechönne, aber das esch üs denn doch en Nommere z vell gsi. Nachdem mer alli mendestens 7x de Fuess verknackt, ufs Födle gheid oder s Chnü verdreit hend hemmer die Üebig abbroche ond send zrogg zom Parkplatz. D Ussecht vo dobe hed sech aber absolut glohnt, d Sicht uf de gross Vulcan näbedra ond de See send onglaublech gsi!Nachher semmer no zomne witere Wasserfall, de La Fortuna Wasserfall grad ide Nöchi vom Vlucan. 500 Stägetrett abe ond ufe hend sech sowas vo glohnt ond mer hend au e Gomp is chalte Wasser gmachd😍 am Obe fein go ässe oswärts ond s nöchste Airbnb bueched för die nöchschte Täg - es god ab uf Tamarindo, ändlech as Meer, mer freuid üs!

PURA VIDA! 🌺Meer informatie