Let's go

Die letzte Täg send wie im Flog verbi gange ond jetzt esch er plötzli do, de Afang vo mim nöchste Abentür. No halb i de Nacht esch d Kaffimaschine im Länzehof i Schwung cho ond de Drükönigschueche (wo kei König denne gsi esch!!) esch verteilt worde. Ond denn esch es au scho los gange a Flughafe. De Absched esch ned ganz liecht gfalle, deför hed alles andere super klapped. Ohni gross z warte beni dor d Security ond d Passkontrolle cho. Die 12 Stond Flog send au relativ schnell verbi gange. D Ziit hani (zumindest teilwiis) gnötzt zom mini Spanischkenntnis met Filme chli z aktiviere. Au s Ässe esch relativ guet gsi. Nor en Fensterplatz hätti alles no chli verbessered. Öpe am 3 am Nomitag beni z San José glandet ond ha direkt en Shuttle is Hotel gha. S Hotel esch ganz ide Nöchi vom Floghafe ond sehr schön. Obwohl ech gnueg müed gsi wär hani mer vorgno noni go z schlofe. D Ziit hani stattdesse gnötzt zom e SIM Karte ond en Adapter go poste. Es esch scho e chli es komischs Gfühl gsi so elei im ne fremde Land omezlaufe, aber ech ha mi emmer wohl gfühlt. Ech bi gspannt was die Ziit do z Costa Rica no alles met sech brengt!Read more