De ersti Tag z San José

Obwohl ech noch de lange Reis ond 7 Stond Ziitverschiebig gester Obe super müed gsi be, beni höt Morge doch s erst Mol am 4i verwached. Es bezli Jetlag ghört halt trotzdem dezue. Zom Glöck hani de doch nomol chönne ischlofe. Bim zwöite Mol verwache beni denn Ufgstande ond ha mi ufs Zmorge Buffet gfreut. Nochdemi gester zom Znacht nor no es paar restlechi Snacks vom Flog gässe ha, hani scho chli honger gha. Öber die frösche Fröcht hani mi am meiste gfreut. Nochem Zmorge hani denn es paar Sache use gsuecht woni z San José chönnt aluege ond ha mer es Uber is Zentrum bstellt. Als ersts hani is Kunstmuseum welle, aber es hed leider ned offe gha (oder ech ha de rechtig Igang ned gfonde..). De beni halt e chli dor d Stadt spaziert. D Stadt hed velli schöni, alti Hüser, aber au vell gönstigi (ned so asprächendi) Läde. I 2-3 zentrale Stosse send vell Lüt onterwegs aber denn werds scho schnell relativ ruhig. Ei Halt hani i de Markthalle gmacht. Det gez vell fröschi Fröcht ond Fisch, aber au en Lade wo mer sech es Huehn oder en Vogel cha poste ond vell Souvenir Lädeli. Vorem Mittag beni zuefälligerwiis met emne andere Tourist vo Holland is Gspöch cho. Mer send denn zäme no chli wiiter spaziert ond im ne Costa Rica-Vietnamesische Restaurant go Zmittag ässe. Er hed nocher es Ticket för en Füehrig im Nationale Theater gha. Ech wär gärn metgange aber leider eschs denn scho usverkauft gsi. Drom hani mi denn entschede no is Museum för Costa Ricanischi Konst z goh. Z Fuess eschs öpe e Halbstond vom Zentrum weg gsi aber ech has spannend gfonde no chli meh z gseh. Bim Museum acho hani aber de Zettel a de Tör müesse läse das es no bis am Mäntig zue esch... Ech ha höt also glehrt das do Sache ned ombidengt offe send nor wells uf Google Maps stod. Tja, de beni halt no chorz i Park näbem Museum ond ha mi denn weder ufe Weg is Hotel gmacht. Ez beni grad vom Znacht zrog cho. Ech ha im Hotel Restaurant Tacos gässe. Die send sehr fein gsi aber ech ha realisiert das eis Ziil vo dere Reis set si z lehre Tacos ohni so fest chosle z ässe. Jetzt packi de no mine Rocksack wel morn goz scho los id USA d Bryanna (mini best Kollegin usem Ustuschjohr) z bsueche. Liebi Grüess usem sonnige San JoséRead more