Ab nach Clemson

Noch nor zwöi Nächt z Costa Rica eschs höt scho weder wiiter gange id USA. Det bsuechi mini best Fröndin vom Ustuschjohr, d Bryanna. Zerst hani aber nomol am feine Zmorge Buffet zuegschlage :). Denn hani mine Rocksack met de Sache woni i de USA bruche packt. Leider hani uf dem Flog werkli nor ei Rocksack Gepäck döffe metnäh (ond d Hälfti esch met Schoggi för d Bry gföllt gsi). Noch es paar Mol ompacke hed de aber s wechtigste ine passt. S restleche Gepäck chani zom Glöck för die Woche im Hotel lo si lo. Am Floghafe hani denn die erst chli Krise gha wel ech mine Covid Impfuswis hät selle zeige, dä aber natürli no i de Schwiz i mim Zemmer lid. Zom Glöck hani chli Helf gha ond es Föteli vo dehei öbercho :). Alles andere hed de aber tiptop klapped. De Flog esch wonderschön gsi. Das Mol hani mine Fänsterplatz gha ond ha uf traumhafti Stränd ond klars, türkisblaus Wasser chönne abeluege. Z Atlanta acho hani de endli d Bry noch 4.5 Johr weder gseh. Sie hed mech metem Joe, erem Maa am Floghafe abgholt ond denn semmer nomol 3 Stond metem Auto bis uf Clemson gfahre wo sie wohned. Am Obe hemmer no en langi To Do Liste gschrebe met Sache wo mer die Woche wend mache. Aber bevors as abhögle god hemmer de doch zerst mol chli Schlof brucht.Read more