Clemson University und Hole-in-ones

De ersti Tag z Clemson hed ruhig agfange. De Joe esch scho früeh uf zom go schaffe, d Bry ond ech send aber am Vormittag dehei gsi. Zerst hemmer gmüetlech öpis Zmorge gässe ond chli pläuderled, de hemmer beidi chli för d Uni, bzw. mis Praktikum gschaffed. Öpe am Mittag hemmer eus de ufe Wäg ad Uni gmacht. D Bry hed mer e Tour vom ganze Campus gäh. Zerst semmer metem Auto osse rondome gfahre (ja, de Campus esch so gross dass mer guet es Wiili metem Auto cha rondome fahre). De hemmer parkiert ond send z'Fuess om d Gebäude spaziert. Anders als echs vo Genf oder Lund kenne send do die meiste Gebäude uf eim Grondstöck ond ned i de ganze Stadt verteilt. Näbst onzählige Uni Gebäudes heds au grossi Wohnhüser för Studente, 2 Fitnessstudios ond Restaurants. Natürli hemmer au s Football Stadium agluegt (s Team vo Clemson esch sogar relativ guet). Ond öberall heds grossi orangigi Tiger Tatze, wel das esch s Maskottchen vo de Uni. Eusi Tour hed bimne grosse, schöne Teich vor de Bibliothek ufghört. Det hemmer uf de Joe gwartet. Er schaffed a de Uni ond hed de Nomitag frei öbercho das mer zäme chönd öpis onternäh. Drom hemmer eus metem Auto ufe Weg rechtig Greenville gmacht. Das esch e grössere Ort wo öpe 1 Stond entfernt esch. Ufem Weg hemmer imne Mongolische Grill Restaurant gässe. Det cha mer sech am ne Buffet rohi Zuetate ond Sauce ussueche ond ines Schösseli packe ond de Koch brötled de das alles ufere riesige, heisse Platte ah. Es esch mega fein gsi! Denn semmer witer a euses eigentleche Ziel: Topgolf. Das esch ähnlech wie en mehrstöckigi Driving Range (d Abschläg send öberenand uf 3 Stöck ond alli schiessed ufs gliche Gras). Im Gras heds grossi Löcher gha wo ählech wie en Ziilschibe ufbaut send. Je besser mer die Löcher trefft, desto meh Pönkt gez. I jedem Ball heds e chline Chip ond so merkt d Maschine wer de Ball gschosse hed ond wie vell Pönkt dases ged. Ech mues ehrlech zuegäh das eusi Ponkteliste ned wahnsennig höch gange esch.. Trotzdem hemmer zwöschedenne d Löcher ned schlecht troffe ond es hed sehr vell Spass gmacht. Noch 1.5 Stond hend d Händ aber langsam weh do vom Schläger ond mer hend eus weder ufe Heiweg gmacht. Öpe ide Metti vom Weg hemmer no e Zwöschestop igleid ond send i Sams Clud. Das esch e Supermarkt wo Produkt i riesige Grössene abietet ond z Amerika sehr beliebt esch. Ech laufe sowiso gern i anderne Länder chli dor d Supermarkt Regal, aber do eschs werkli lostig gsi i wie grosse Packige dases Snacks, Haferflöckli oder Essiggörkli ged! Mer hend no e Pizza ipackt wo mer de dehei zom Znacht gässe hend. Dezue hemmer Speli gspellt. Dutch Blitz, Azul ond Hearts send definitiv neui Speltipps vo mer :)Read more