Es neus Hobby? 🪓

Wel Gester ned so vell passiert esch hani höt e Post vo beidne Täg. Gester Vormittag send d Bry ond ech weder dehei gsi ond de Joe esch früe go schaffe. Ech ha es Meeting för d Uni gha drom hemmer weder dehei chli gschaffed (ond zwöschedenne vell pläuderled). Nocher hemmer e chline Spaziergang imne Park ide nöchi gmacht. Ufem Weg det he semmer dor vell Wäldli gfahre ond i dene Wäldli heds schöni Hüser gha wo Lüt denne wohned. De Park esch ned so gross aber er hed velli verschednigi Sportfälder: Tennis, Fuessball, Baseball, etc. Die chamer eifach bruche ohni müesse z zahle. Mer hend e chlini Rondi om e Teich gmacht ond send öbers Bröggli gloffe wo de Joe de Bry de Hürotsatrag gmacht hed. Am Nomitag semmer de weder dehei gsi, hend Cookies bached ond hend e Stofftäsche bedrockt. D Bry hed e Maschine wo mer sis Design wo mer wet ganz selber cha mache onds de usere Folie cha usschnide wo mer de uf verschednigi Sache cha glette oder chläbe. Am Obe wo de Joe weder hei cho esch hemmer weder verschednigi Speli gspellt. Höt Morge beni früeh met desne ufgstande. D Bry ond de Joe send zäme id Uni gfahre ond ech be es paar Stond elei dehei gsi ond ha chli för mech gschaffed. Wo d Bry weder hei cho esch hemmer zäme schwedischi Kardamom-Schnägge bached. Ech has Rezept för en Instagram Post vo de Studenteverbendig z Schwede müesse teste ond es esch e guete Grond gsi zom öpis feins z bache. Währeddem de Teig zom erste Mol ufgange esch semmer no ines paar Läde i de nöchi gange. Ech be chli erstunt gsi dases do sogar en Aldi ged. D Bry hed mer au de Lade zeigt wo sie alli Sache zom bastle chauft. Bi dere grosse Uswahl chani verstoh wenn mer gärn vell bastlet. Gli hemmer aber au scho weder hei mösse zom de Teig i Schnägge z forme. Die hend de nomol müess ufgoh. I de Zwöscheziit hemmer wahrschindlech eini vo de speziellste Freizitbeschäftigonge gmacht woni glaub bis jetzt usprobiert ha: mer send go Axt rüere. Det hed mer en Axt wo mer uf e grossi Zielschiibe rüert ond hofft dass sie (möglechst i de Metti) stecke blibt. Es gsed ned so schwerig us, aber ganz so eifach esches au ned. Ond vor allem am Afang fühlts sech sehr komisch ah. Mer hend 1 Stond bueched aber, wahrschindlech wells so lär gsi esch, hed eus die wo det gschaffed hed gar ned gseid wenn mer mönd go. Drom hemmer schlossendli fast 2 Stond gspellt. Alles i allem fendis emmer no chli komisch dases das ged, aber es hed au vell Spass gmacht ond ech ha tatsächli mängisch is 'Bulls Eye' i de Metti troffe. Bevors ufe Heiweg gange esch hemmer no es mega feins Glace gholt. Ech ha eis gha wo nor uf gmixte Banane basiert hed. Weder dehei acho hemmer eusi Kardamom Schnägge fertig gmacht ond natürlech weder Speli zäme gspellt.Read more