Go Swamp Rabbits!

Höt hani nomol e relativ ruhige Tag gha. D Bry ond de Joe send weder am Morge früeh id Uni gange. Ech bi aber no chli länger im Bett blobe ond be de grösst Teil vom Tag elei dehei gsi. D Ziit hani gnötzt zom mini erste Plän z Costa Rica z mache. Ursprönglech hani vor gha no chli z San José z blibe bis mini erste Kollege achömed. Ech ha mech ez aber entschede doch direkt wiiter z fahre ond am Sonntig no e Bus uf Manuel Antonio z näh. Das esch e chline Ort met emne sehr bekannte National Park. Am spötere Nomi hend d Bry, de Joe ond ech üs de ufe Weg uf Greenville (de glich Ort wie de Topgolf gsi esch) gmacht. Höt aber ned zom Golf spele sondern zom Ishockey luege. D Greenville Swamp Rabbits (heisst öbersetzt Sumpfkaninchen) hend gege d Florida Everblades (abgleitet vom Everglades National Park, aber blades = Klinge) gspellt. S Stadion esch riesig gsi för das dases nor es semi-pro Team esch. Aber es send au ned alli Plätz voll gsi. Mer hend zerst Plätz imne Egge ganz vore gha, hend die aber de nochem erste Drittel gwächsled das mer s ganze Feld guet gseh hend. S Spel hed Spass gmacht zom luege ond esch gäges Endi sogar no sehr spannend worde. Erst im Penalty-Schiesse hend d Swamp Rabbits de gwonne.Read more