Euse ersti Schueltag

Höt hemmer euse ersti Schueltag a de Universidad Nacional de Costa Rica gha. S Programm hed offiziell am 9:30 agfange. Wel mer ned genau gwösst hend wie lang mer metem Taxi det he hend semmer gnueg gli gange ond hend de no öpe e halb Stond Ziit gha zom de Campus chli aluege. Die Fakultät wo mer ez dezueghöred esch ned am Hauptstandort vo de Uni drom esch de Campus ned so gross gsi. Es hed aber trotzdem mehreri Gebäude, es Wohnhus, en Cafeteria, es Fitness Center ond sogar e lange Pool (wo mer aber ned döfid bruche). Eusi ersti Stond esch e chlini Ifüerig vom International Office gsi. E Mitarbeiteri hed eus e chlini Iifüerig zo Costa Rica gäh ond eus die wechtigste Infos gäh wo mer bruched. Zwöschedöre semmer alli chli is chalte Wasser grüert worde, wel es esch ned emmer so eifach gsi z verstoh was sie verzellt (alles uf spanisch..). Aber ech glaub mer hend eus ned schlächt gschlage. Am Mittag hemmer zäme met zwöi Professore ond 4 Studente usem Partner Programm do gässe. Bevor mer hend döffe ässe hemmer aber alli eus müesse vorstelle ond e chli öpis dröber verzelle was mer z Costa Rica gärn wetted mache. Au uf spanisch. Aber ech glaube alli hend ongefähr verstande wasi ha welle säge ;). Nochem Ässe hemmer e chlini Füehrig dör die zwöi Hauptgebäude becho. Ufem Wäg hemmer bi jedem Büro halt gmacht ond eus öperem vorgstellt. Es send chli vell Näme gsi om sech z merke wer das alles gsi esch, aber es esch au no schön gsi z gseh dass do alli Freud hend das mer do send. Noch de Tour semmer nomol i Vorläsigsrum ond hend d Agenda för die nöchste paar Woche agluegt. Mer hend ez zwöi Woche fast jede Tag am Morge ond am Nomi e Vorläsig a de Uni. I de drette Woche hemmer kei Vorläsig meh aber send no bis am Donnstig done. Denn gömmer de wiiter uf Hojancha wo mer nocher au bis Endi April send. Öpe am 15:00 hemmer Fürobe gha. Es esch zwor e relativ chorze Tag gsi, aber wel mer so vell uf spanisch gsi esch esches doch en asträngende Tag gsi. Wel mer alli no es paar anderi Sache ztue gha hend semmer vorem Heigoh no ines Kaffi im Zentrum vo Heredia gange. Det hemmer alli no chli a eusne eigete Sache wiitergschaffed bevor mer de hei send ond eus rechtig feini Wraps zom Znacht gmacht hend. Jetzt esch grad chorz vor 10i ond mer send alli scho fast oder ganz im Bett. Aber das esch au guet so wel morn werds secher au weder sträng.Read more