Einisch quer dor Costa Rica

Höt esches wiiter wiiter gange öber San José uf Puerto Viejo de Talamanca ade Karibik Küste. Am Morge am nüni esch euse erst Bus gfahre. D Fahrt wo eigentli 2 Stond hät selle dure hed wegem Verkehr öpe 3.5 dured. Aber mer hend zom Glöck gnueg Ziit iplaned zom Omstige z San José. Wo mer acho send hemmer müesse de Busbahnhof wächsle. D Büs do send vo verschednige Firmene ond jedi Firma hed ere eigeti Bahnhof ergendwo ide Stadt. Euse esch zom Glöck grad ide Nöchi gsi, aber mer chönnt au Päch ha ond zerst dor die ganz Stadt müesse laufe. Ufem Weg hemmer die agnähmere Temperature gnosse. Z San José esches dütlech chüeler als z Jaco (aber emmer no warm). Am neue Bahnhof hemmer de als ersts welle d Tickets am Schalter chaufe. De Verkäufer esch aber grad ide Mittagspause gsi. Drom han ech gseid ech warte ond desi send go erkonde wo mer chönnted Zmittag ässe. Ech wär zvorderst ide Schlange gsi aber wo de Schalter ufdo hed hani gseh das mer ned cha met Karte zahle. Natürli hani ned gnueg Bargäld för alli Tickets gha ond ha mi uf d Siite gstellt. No bevor desi zrog cho send send de aber alli Tickets för de Bus wo mer hend welle näh usverkauft gsi. Es esch scho chli blöd gsi, aber zom Glöck heds am 4i (2 Stond spöter) nomol e Bus gha. Währedem warte send de d Marie ond d Isabel no zo eus gstosse. Sie send vor zwöi Täg z Costa Rica acho ond send jetzt no z San José gsi. Jetzt semmer aber alli zäme wiiter. Währedem warte hemmer imne Soda (das send die traditionelle/lokale Restaurants do) Zmittag gässe ond enand chli verzellt was mer bisher scho erläbt hend. D Ziit esch schnell verbi gange ond scho gli hemmer i euse Bus chönne. De Bus esch super agnähm gsi ond hed sogar e Klimaalag gha. De ersti Teil vo de Fahrt esch super schön gsi. Mer send dör Bärge ond Hügel wo voll met Rägewald send gfahre. Ech has rechtig gnosse chli usem Fenster z luege. Denn esches aber scho gli donkel worde ond mer hend alli chli gschlofe oder Musig glosst. Die ganz Fahrt hed öpe 5 Stond dured. Acho in Puerto Viejo hemmer es Taxi welle näh zo eusem AirBnB. Z Fuess wärs öpe e Halbstond ade Hauptstross entlang gange. Im Donkle wär das chli gförlech gsi. Es hed aber kei Taxis sondern nor TukTuks gäh. Det esch min Koffer e dütleche Nochteil gsi. Desi hend aber zom Glöck alli nor e Rocksack ond so hemmer doch ergendwie uf die TukTuks passed. Es esch e chli e Challenge gsi euses Hüsli z gfende, aber onterwegs hemmer sogar es Fuultier gseh ond wo mer entli acho send hend e rechtig, rechtig positivi Öberraschig gwarted. Euses Hüsli esch onglaublech schön. Es esch fast alles komplett verosse ond nor öberdacht. Zode Zimmer heds Schiebetöre, aber au die verschliessed ned ganz. Es hed e grosse Stobebereich ond e grossi, schöni Chochi. Sogar s Bad hed gäge use nor Vorhäng ond kei rechtigi Wänd. Mer fühled eus also rechtig ide Natur do. Hiterem Hus heds es chlises Gärtli ond det hemmer au scho Tier gseh. Alles i allem gods eus aso rechtig guet do :)
PS: Föteli hani höt leider keini gmacht..Read more