De Alltag hed agfange

Höt semmer de ganz Tag ide Uni gsi. Obwohl die erst Vorläsig erst am 9.30 agfange hed semmer scho vell gliiner los wel mer höt de Bus gno hend. Do mues met emmer gnueg Ziit för de Bus iiplane wel mer ned ganz secher cha sii wenn daser tatsächli chond. Höt esches guet gsi das met gnueg früeh gange send wel mer hend öpe e Halbstond müesse warte. Woner de aber cho esch esch alles tiptop gange ond mer send trotzdem no zfrüeh ade Uni gsi. Höt hemmet de ersti typischi Schueltag a de Uni gha. Das heisst mer hend am Vormittag ond am Nomittag je ei Vorläsig. D Vorläsige send emmer vo anderne Professore wo eus e Iibleck i eres Forschigsfeld gänd. Dör das hemmer e chli meh Idee was genau mer chönd mache för d Masterarbet ond wer eus debi vellecht chönnt helfe wenn mer Froge hend. Förs Zmettag semmer is chline Soda (es traditionells Restaurant z Costa Rica) ufem Campus gange. Mer send zäme ghocked met es paar vo eusne Professore ond hend weder chli chönne euses spanisch üebe. Es esch no cool dass do alli Verständnis hend dass mers noni so guet chönd aber sie trotzdem ned uf änglisch wechsled. So chömmer alli vell meh dezue lehre. D Vorläsig am Nomi hani recht asträngend gfonde. Obwohls jo nor es paar Stond am Tag send wo mer aktiv ide Uni müend sii esches met de neue Sproch scho gnueg sträng. Noch de Vorläsig semmer no onerwarted binere chline Geburtstagsparty debi gsi. S Team vo eusere Fakultät fiired anschinend emmer Endi Monet d Gebortstäg vo dene wo i dem Monet Gebortstag gha hend. Ech has härzig gfonde dass sie emmer zäme fiired aber ech mues zuegäh dasi vom Chueche do weniger Fan be.. Vorem Heigo hemmer eigentli no welle go schwimme. Öpe 20 Minute z Fuess vom Airbnb heds es chlises Freibad. Wo mer det aber acho send hends eus gseid dases onter de Woche emmer nor vo 11-13 offe hed. Drom semmer de halt doch direkt hei ond hend Znacht gässe. Euse normali Rhythmus esch öpe am 10i is Bett ond de zwösche 6i ond 7i ufstoh. Höt aber ned. D Studentinne ond Studente wo mer gester kenne glehrt hend hend eus gfrogt öb mer met ehne wetted öpis go trenke noch erere Vorläsig. Drom hemmer eus met ehne am 10i z San José troffe (öpe 30min vo eusem Airbnb). Obwohls chli spot gsi esch beni trotzdem froh das mer gange send. Es esch cool do au es paar Lüt kenne z lehre ond chli meh öber sie z erfahre. Die meiste send ursprönglech vo anderne Länder in Latinamerika, drom hends ganz vell neus z lehre gäh. Wos de aber gheisse hed das d Bar gli zuetued beni ned so trurig gsi ond mer hend üs ufe Heiweg gmacht.Read more