Reset search
Riccarda SchmidRiccarda Schmid
SatelliteEdit route
traveled in 3 countries Read more
  • TravelerCosta Rica
    Day 71

    Wie vell Handynommere chomi öber?

    March 17, 2023 in Costa Rica ⋅ ⛅ 26 °C

    Höt Morge beni met de Isabel ond em Saad ufe Wäg. D Isabel hed es Interview in Matambú gha. Das esch de indigeni Teil vo Hojancha, det wo mer au gsi send go töpfere. De Saad ond ech hend währed ehrem Interview im Auto gwartet. Wo sie fertig gsi esch semmer zrog rechtig Zentrum ond det hed de Saad d Isabel ond mech useglo ond esch de Rest dehei go abhole. Ech ha die Ziit gnötzt zom im Park wo zmetzt in Hojancha esch Lüt ahzspräche ond z froge öb sie mine Frogeboge chönd usfölle. För das hani eifach alli woni gfonde ha agsproche, ehne chli vo minere Arbet verzellt ond gfogt öbi ehri Handynommere cha ha zom ehne denn spöter de Link zo de Omfrog z schecke. Es hed jedes Mol weder chli öberwendig brucht uf öper zue z goh. Aber die allermeiste send super fröndlech gsi ond hend mer gholfe. Dass aber au ei, zwöi komischeri dronder gsi send hani de spöter gmerkt woni Antworte uf mini Whatsapp Nochrechte öbercho ha… Wo de Saad met desne zrog cho esch hani 32 Handynommere zämegsammled ond langsam gnueg vom Lüt aspräche gha. Eis ‘Problem’ wo mer näb eusere Masterarbet no setted löse esch euses Visum. Mer hend eigentlech ahgno das mer metem Touriste-Visum chönd do sii ond hend au iiplaned, dass mer alli einisch usem Land usreised bevor die 90 Täg ome send. D Uni verlangt aber trotzdem, dass mer de Prozess vomne andere Visum afönd (was e relativ tüüri Sach esch). Mer hend ez afe mol metem gönstigste Versuech agfange ond send alli zäme ide Bank verbii om det ergendwelchi Stempel z chaufe. Dä Versuech esch aber hende use, mer öberchond die nor inere grössere Filiale. Mol luege wenn mer das i Agreff nämed… Am Obe send d Jungs no fort gange. D Isabel, d Marie ond ech send aber dehei blobe, hend eus öpis Znacht gmacht ond gmüetlech zäme chli Serie gluegt.Read more

    See translation
  • TravelerCosta Rica
    Day 70

    Debi bimne Community Meeting z Hojancha

    March 16, 2023 in Costa Rica

    Höt esch weder einisch eine vo dene Täg gsi wo ganz anders verlaufe send als ech bim Ufstoh no erwartet hät. Zom Zmorge heds zerst mol e grossi Portion Gallo Pinto (Riis met Bohne) gäh. Denn heds plötzli gheisse das mer zomne Meeting iglade send. Das Meeting esch vo de Peace University (San José) gsi. Es esch om es Projekt gange wo vo de Amerikanische Botschaft in Costa Rica finanziert esch ond om d Entwecklig z Hojancha god. Am Meeting send ganz vell lokali Akteur debi gsi (verschednigi Organisatione, Firmene ond vom Kanton). För drü vo eus eschs relevant för d Masterarbet gsi ond drom semmer gange. Stattgfonde heds in Monte Alto, dem Naturschotzgebiet wo ech i minere Arbet ontersueche. Wel mer so spontan devo ghört hend semmer e chli z spot cho. Zerst hemmer zwöi Vorträg dröber glost, wie de Klimawandel Hojancha betrefft ond was das för d Lüt ond d Firmene do bedütet. Nochere chorze Kaffipause heds denn en Workshop gäh. Alli Lüt hend sech i zwöi Groppe onterteilt: eini för Wassermanagement, e anderi för Produktwirtschaft. Ech be ha mech zo de zwöite gstellt ond det de Diskussion zueglost. S Thema vo beidne Groppene esch gsi z diskutiere wo dass es z Hojancha Problem ged ond wo dass mer muess Brogge baue zom die Problem löse. Es esch rächt spannend gsi zom zuelose ond z gseh wie alli liideschaftlech debi gsi send. Verstande hani zwor ned alles, aber ech ha trotzdem neus dezue glehrt. Nochdem Workshop heds no es Zmittag för alli gäh. Ufem Weg det he hani no probiert es paar Lüt azspräche ond z froge öb sie mine Frogeboge chönd usfölle. Aber alli woni gfrogt ha hend gseid sie heiged scho vo mer ghört ond de Link scho öbercho. Uf die eint Siite hani mi mega gfreut, es hed sech aber au chli komisch agfühlt, dass ez plötzlech so vell do vo mer wössed. Es hend sech aber au es paar spannendi Gspröch ergäh ond ech glaube ech ha zwöi Interviewpartner gfonde för d Vertüfigsinterviews woni nöchst Woche no wet mache. Weder zrog dehei acho hani zerst mol e chlini Pause brucht ond mech de nomol a mini Arbet gsetzt. Zwöschestand send ez 52 Antworte uf mine Frogeboge :). Öpe am 4i send d Isabel ond ech no zäme go jogge. Mer send grad no rächtziitig gange. Ufem ganze Wäg hemmer die raabeschwarz Wolke am Himmel beobachtet ond uf de letzte 10 Meter heds afo rägne. Au höt heds weder rächt möge rägne.. Mol luege öb das ab jetzt werkli jede Tag so wiiter god.Read more

    See translation
  • TravelerCosta Rica
    Day 67

    De Himmel lod Flöss lo rägne

    March 13, 2023 in Costa Rica ⋅ 🌧 28 °C

    Das bezli Räge wo mer gester erläbt hend esch nüd im Verglich zo dem wo mer höt öbercho hend. De Morge esch relativ ruhig los gange. Ome Mittag ome heds de aber rechtig afo rägne. Ime riise Sprint hani mini Wösch woni am Morge gwäsche ha müesse ine näh, zom Glöck hani chli Hilf öbercho. Ech glaub ech ha no nie so vell räge gseh. Öber ne Stond heds so rechtig abe glärt. De Gmeinschaftsbereich heds komplett gflueted ond d Tesch hemmer ganz id Metti müesse schiebe dass d Laptops ned nass werded. Rede hemmer praktisch nömme chönne wells so luut gsi esch. Met de Ziit hemmer de au gmerkt, dass eusi Zimmer Deli ned decht esch. I de Metti vom Ruum heds afo abe tropfe. Zom Glöck esches aber ide Metti gsi, so send immerhin alli eusi Bett troche blobe. Ergendwie esch das e ganz e spezielle Tag gsi. E chli heds sech abentürlech agfühlt well das eigentli ned hät selle passiere, e chli beni au beidrockt gsi wie vell Wasser do usem Himmel cha cho ond e chli heds mi au truurig gmacht wels dä Räge ez nor wegem Klimawandel ged... Am Obe heds denn au no e Stromusfall gäh. För es paar Sekunde esch das scho es paar Mol vorcho aber dasmol eschs chli länger gange biser zrog cho esch. Mer send grad am choche gsi aber zom Glöck hemmer e Gasherd, de heds doch no öpis Znacht gäh.Read more

    See translation
  • TravelerCosta Rica
    Day 66

    E rägnerische Strandtag

    March 12, 2023 in Costa Rica ⋅ 🌧 28 °C

    Höt hed sech eusi Groppe ufteilt. D Jungs hend welle go es Fuessbalspiel z Nicoya luege. Mer hend öberleid au z goh, aber es hed gheisse dass mer mindistens 3 Stond vorher mues det sii zom e Platz reserviere ond mer hend de doch ned so Lost gha so lang det z hocke ond z warte. Dass mer trotzdem ned hend müesse dehei blibe hed eus de Saad (de einzig wo daf met eusem Mietauto fahre) a Strand uf Sámara gfahre. Mer hend eusi Laptops debi gha dass mer e Meschig zwösche schaffe ond bade chönd mache. Ufem Weg Rechtig Sámara send d Wolke aber emmer donkler worde ond ergendwenn heds sogar afo Rägne. Abgseh vo ganz am Afang esch das euse ersti Räge z Costa Rica gsi. Ond es esch au ganz ontypische Räge wells erst Endi April weder set rägne. Jetzt grad semmer nämli ide Trocheziit ond die esch do normalerwiis 100% troche. De Räge hed eus bis uf Sámara verfolgt ond det send dementsprächend au alli Cafes komplett voll met Lüt gsi. Ergendwo hemmer de aber trotzdem es Plätzli gfonde ond hend det metemne Kaffi ond emne relativ guete Gebäck (soscht semmer ned so öberzügt vo de Bachkönst vo Costa Rica..) e chli gschaffed bis de Räge nochegloh hed. Öbere Mittag esches de troche worde ond hed chli ufdo. Die Chance hemmer gnötzt zom is Wasser gompe. Gfühlt esch s Wasser höt chli chüeler gsii, aber emmer no gnueg warm zom es Wiili denne z blibe ond d Welle z gniesse. Noch dere chorze Pause semmer wiiter i das Cafe wo mer am Morge scho hend welle go ond hend det öpis Zmittag gässe ond e chli wiiter gschaffed. Am Obe esch eus de Saad de weder cho abhole. Ufem Heiweg hemmer no en Töffonfall gseh. Er schiint ned ganz e so schlemm gsi z sii aber es hed eus trotzdem schnell chli us de Bahn gworfe. So wie d Lüt do fahred, vor allem ufem Töff (zom Teil ohni Helm ond nüd ond au ned so vorsechtig) chani mer guet vorstelle dass do hüfig öpis passiert... De Obe hed aber trotzdem es guets Endi gno. Währeddem mer ufem Heiweg gsi send hed de Philip nämli för eus e grossi Portion Spaghetti gchoched.Read more

    See translation
  • TravelerCosta Rica
    Day 65

    En extra grosse Beach Day

    March 11, 2023 in Costa Rica ⋅ 🌧 21 °C

    Es esch weder Wochenend ond mer hends höt metemne extra grosse Strandtag gnosse. S Ziel esches gsi so vell Stränd wie möglech z bsueche. Als ersts semmer ad Playa Conchal, öpe 1.5h vo do weg. Conchal bedüted uf Spanisch Muschle, drom hemmer eigentli e Strand erwarted wo voll met Muschle esch. Es hed zwor es Paar gha, aber bi wiitem ned so vell wie mer erwarted hend. Deför esch de Strand soscht traumhaft schön gsi. Er esch relativ leer gsi ond es esch werkli nor Strand gsi, ohni Restaurant ond Touri-Lädeli. S Wasser esch perfekt türkis gsi ond schön warm. Dä Strand hed eus rechtig guet gfalle. Nochere lange Badepause hemmer eus ufs Zmittag ufe Weg is nöchste Dorf gmacht. Det semmer imne Soda go ässe. Ech ha mech zom Glöck för e normale Casado entschede (traditionelle Teller met Riis, Bohne, Salat, Platanos, Gmües/Fleisch). D Isabel ond d Marie hend de Fehler gmacht Spaghetti met Tomatesauce z bstelle. Mer chönnt meine mer cha det ne so vell falsch mache, aber das esch de Bewiis gsi dases au ganz schlecht cha usecho. Am Strand vo dem Ort hemmer nor schnell d Ussecht gnosse ond send denn witer gfahre före nöchst Badestrand. Das esch d Playa Danta in Las Catalinas gsi. Las Catalinas esch e berüehmte Ort wo hauptsächlech touristisch esch. Es werkt chli könstlech (ählech wie Beever Creek ide USA). D Hüser werked fast chli europäisch inspiriert. De Strand esch recht starch met Bäum bewachse gsi. Det hemmer chönne dronder legge ond hend schön Schatte gha. Ond au d Ussecht esch dor d Blätter no chli schöner worde. E chli wiiter osse im Wasser heds es Floss gha wo mer hed chönne useschwemme ond vo det die farbige Fischli im Wasser beobachte. Au dä Strand esch schön gsi. Wel de Sonneontergang scho fast do gsi esch hemmer de entschede nömme zomne wiitere Strand z fahre, sondern det de Sonneontergang z gniesse. D Warteziit hemmer met emne (onverschämt tüüre) Glace versüesst ond de zuegluegt wie de Himmel rosa ond lila worde esch. Öberem Wasser hed mer de Vögel cgönne zueluege wie sie chreised ond plötzlech is Wasser plumsed zom e Fisch foh (ha es Video gmacht). Sobalds donkel gsi esch hemmer eus ufe 2 stöndig Heiweg gmacht. Müed aber erholt semmer dehei sofort is Bett.Read more

    See translation
  • TravelerCosta Rica
    Day 64

    Happy Internationale Frauetag

    March 10, 2023 in Costa Rica

    Vo gester geds ned so vell spannends z verzelle aber mer hend zom erste Mol es Video vo eusne Pull-ups gmacht. D Marie, d Isabel ond ech möched jede Tag Pull-ups metem Ziel dass mer ergendwenn e ganze chönd. Mer bruched definitiv emmer no das Band, aber mer schaffed scho vell meh als am Afang :).
    Au de hötig Tag esch zom Thema starchi Fraue gsi. Wel am Mittwoch de internationali Frauetag gsi esch heds höt im Dorf e spezielle Frauemärt gä. Eigentli esch do jede Fritig Märt, aber höt hend nor Fraue ehri Produkt verkauft ond zwöschedenne heds Vorläsige, Podiumsdiskussione, es Bingo ond am Obe e Tanz gäh. Mer send nor för die erst Hälfti det gsi, aber es esch rechtig inspirierend gsi wie sech die Fraue det gägesiitig onterstötzed. För es paar vo eus esches au e perfekti Glägeheit gsi zom Interview Kontakt z sammle. Zom Zmittag semmer ines chlises Restaurant ide Stadt wo ech no nie gsi be ond am Nomittag hemmer imne Kaffi chli gschaffed.    Read more

    See translation
  • TravelerCosta Rica
    Day 62

    D Masterarbet chond langsam in Fahrt

    March 8, 2023 in Costa Rica ⋅ ☁️ 29 °C

    Nochdem gester weder e relativ onspektakuläre Tag gsi esch wo mer nor vo dehei us gschaffed hend esch höt weder e Tag gsi wo chli meh Öberraschige met sech brocht hed. Als ersts hätti am Morge es Meeting met mim Masterarbet-Betreuer vo Schwede gha. Er hed mer aber am Afang vom Meeting gseid, das er de Frogeboge woni ehm gscheckt ha ned hed chönne ufdue ond drom kei Feedback för mech hed. Das Feedback wär eigentli wechtig gsi för mech wel ech de Frogeboge ezde glii wet useschecke. Euses Meeting esch drom noch ere Viertelstond scho weder fertig gsi. De Rest vom Täg wär eigentli denkt gsi zom dehei schaffe. Ech ha aber chorzfrestig es SMS öbercho öb ech e Mitarbeiter vo Monte Alto wet am 10.15 interviewe. Wel das au obe uf minere Prioritätsliste för die Woche gstande esch hani zuegseid ond mech no ganz schnell druf vorbereitet. Es esch spannend gsi z ghöre was er öber d Uswerkige vo Monte Alto uf d Gsellschaft z säge gha hed. Er hed es sehr positivs Bild (was au verständlech esch wenn er jede Tag för das schaffed), aber ech be gspannt öb d Lüt wo mini Omfrog usfölled s gliche Bild hend. Ech ha secher ersts Material öbercho woni i de Arbet cha bruche. De Rest vom Tag esch de aber so ruhig wie erwartet wiitergloffe.
    Ah ond Happy Internationale Frauetag!    Read more

    See translation
  • TravelerCosta Rica
    Day 60

    Gfühlt wie z Schwede

    March 6, 2023 in Costa Rica ⋅ ☁️ 32 °C

    S Highlight vom hötige Tag esch definitiv gsi das d Isabel ond ech e grossi Portion Zimtschnägge bached hend. Vorbereitet hemmer sie scho gester Obe, aber es esch de z spot worde zom sie alli no bache (vorallem wel euse Bachofe seeehr schlecht esch ond emmer nor eis Bläch ine mag). Ech ha sie höt Morge i Ofe do ond zom Vormittagskaffi hemmer alli die erst chönne probiere. E chli hemmer eus weder wie z Schwede gfühlt. Mer send eus alli einig, sehr lang wärdeds die Zimtschnägge ned öberläbe ;). Vo höt hani au mol Föteli vo de Hönd wo eus emmer chömed go bueche. Mer gsänd sie eigentli fast jede Tag ond sie verlanged sehr klar, dass sie chli gstreichled mönd werde. Höt sends aber au chli fräch onterwegs gsi ond hend im Philip sine Socke gklaut (dä esch aber au scho lang omegläge). Das chond devo wenn mer sini Sache ned wegrumt...Read more

    See translation
  • TravelerCosta Rica
    Day 59

    Eusi Töpfli send gli fertig!

    March 5, 2023 in Costa Rica ⋅ ☁️ 33 °C

    Höt esch weder rechtig schöns Sonntigsprogramm agstande. Mer send nämli zrog uf Matambú. Das esch det wo mer letzt Woche töpfered hend. Eusi Töpfli hend ez e Woche chönne tröchne ond send parad gsi zom poliert ond dekoriert z werde. Es hed eus allne rechtig Spass gmacht ond mer freued eus wenn sie de entli brönnt send ond mer sie chönd metnäh. Wo mer alli fertig gsi send ond eusi Töpfli so guet wies god perfektioniert hend hed eus de Ezequiel no metgno zo es paar Naturpools wos ide Nöchi hed. Die send so ähnlech wie die wo au be eusere Onterkonft i de Nöchi send ond es esch rechtig schön gsi det dri z höpfe. Bevor mer eus de weder ufe Heiweg gmacht hend hed im Ezequiel sini Frau eus no erklärt wie mer Jícaras cha mache. Das send chlini Schäleli oder Becherli us so ronde 'Fröcht' wo am Baum hanged (mer aber för nüd soscht cha bruche). Es esch ned ganz eifach aber ech glaube mer kenned ez de Prozess ond vellecht probieremers dehei au mol. Gäge Obe beni no go Jogge. Das Mol hani mi för d Route de Berg doruf entschede. Es esch mega asträngend gsi aber hed guet do mol rechtig müedi Bei z ha. Ond för d Ussecht heds sech au glohnt.Read more

    See translation
  • TravelerCosta Rica
    Day 58

    Endlech a Strand

    March 4, 2023 in Costa Rica ⋅ ☀️ 31 °C

    S Wochenend esch do ond met eusem neue Auto chömmer ez endli mol öpis go entdecke. Gstärkt hani mi am Morge, wies sech z Costa Rica ghört, metere Portion Gallo Pinto. Das esch Riis met Bohne abrötlet ond wenn mer wot no met chli Gmües denne. Ond denn esch es los rechtig Sámara gange. Das esch es Städtli a de Pazifikküste wo zemlech touristisch esch ond au vell Lüt he gönd zom Surfe. D Fahrt hed öpe e Stond dured ond ech be froh gsi, dass ech ned ha müesse fahre. Öpe d Hälfti vo de Strecki esch ufere Kiesstross gsi wo ned sehr guet zwäg gsi esch ond ab ond zue sehr steil doruf oder dorab gange esch. För s nöchste Mol hoffemer, dass mer no e besseri Route gfended. Z Sámara acho semmer direkt rechtig Strand. Es esch zemli warm gsi ond de Sand hed definitiv s Potenzial gha d Füess z verbrönne. Mer hend aber no es chlises Schatteplätzli gfonde ond send zerst mol is Wasser ghöpft. S Wasser esch rechtig warm (wenn mer die Temperatur doch au zom dusche hätted...). Desi hend sech nocherno entschlosse e Stond es Surfboard z miete ond ech ha i de Zwöscheziit uf eusi Sache ufpasst ond chli gläse. E chline Schreck i dere Stond esch gsi dass bi einere wo i de Nöchi vo mer gläge esch plötzlech e Kokosnuss abegheit esch ond ere Chopf nor hoorscharf verpasst hed. Mer mues aso sehr guet luege i wele Schatte mer sech am Strand do leid.. Nochdem desi eres Surfbrett weder zrog gä hend hemmer us uf d Suechi nochemne Zmittag gmacht ond hend es chlises Restaurant met Falafelwraps gfonde (wie z Schwede!). De Rest vom Nomi semmer de no chli omegspaziert ond hend am Strand no öpis tronke ond dezue de Sonneontergang gluegt.Read more

    See translation

Join us:

FindPenguins for iOSFindPenguins for Android

  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English