Satellite
Show on map
  • Day 26

    Kia ora - welcome to "Aotearoa"

    September 24, 2017 in New Zealand ⋅ 🌙 12 °C

    Kia ora - willkomme in Neuseeland!
    Ich bin bereits sit über enere Wuche in Neuseeland. D ziit verflüügt, han nämli s Gfühl, dasi erscht grad aacho segi...

    Bin binere liebe Gaschtfamilie, han e riisigs Zimmer (guet, wer mis Zimmer kännt, weiss dass das schnäll mal möglich isch) und s gfallt mer ächt da z'Nelson. Dur das dass Früelig isch, rägnets sehr oft und sehr starch, meischtens isches sehr chalt - au im Huus drin. Däne ihre Fänschter chöntisch nämli grad wäglah - die dichtet überhaupt nöd... S Wätter chan aber au sehr rasch umschlah und denn chans aso ächt heiss wärde. Han mi innerhalb vonere Wuche scho 3 mal verbrännt und han so de Verdacht, dases eppe so wiitergaht. Ich chönt mi na 100 mal am Tag iigräme, d Sunne isch extrem starch da!

    Geschter simmer is " Centre of New Zealand" gwanderet, das isch eich sochli de Huushügel/Bärg vo Nelson und isch exakt die geographischi Mitti vo Neuseeland.

    Han natürli au Schuel und die isch aso ächt aaschträngend! Mer sind 10 Lüüt i eusere Klass - 7 Schwiizer, 2 Dütschi und ein Südkoreaner. Das isch halt chli schaad, au ade Schuel susch sind sehr villi Schwiizer...

    Hüt bini min erschte Rugbymatch go luege- für die wons ned wüssed, Rugby isch enart d Religion vode Kiwis (Kiwi=Neuseeländer) Aso die won mi kenned, wüssed dasi Fuessball zimli dämlich finde und eppe ähnlich gahts mer mit Rugby. Alli stürmed uf de Ball, raufet mitenand, kämpfed um de doof Ball... Naja, nöd so ganz miis aber doch emale spannend gsi zums gseh z'ha.

    Mir gahts mal chli uuf und ab. Es isch halt aaschträngend, wieder sochli es normals Läbe z füere, wieder id Schuel z gah und nöd z'letscht au zum neui Fründe z finde. Das alles brucht vill Energie und au Närve zums durestah.. Ich mein, s isch ächt schön da aber momentan isches au na sehr aaachträngend...

    Liebi Grüess id Schwiiz und ich schicke eu e Umarmig!
    Read more