Acho ir Grossstadt

So, i wächsle hie iz uf Berndütsch... Wiso oh immer i uf Hochdütsch ha agfange isch mer es Rätsel, aber iz...

I dere Wuche bini endlech e chli acho i dere Grossstadt u ha mi a aues gwöhnt. Näb dr Schuel hani a de Namitage nid sehr viel unternoh. I ha e Tour mit dr Schuel unternoh, wo üs hät söue z El Ateneo zeige. El Ateneo isch e Büecherlade im ne aute Theater. Dr Guide het vieles über Gebäude rundum verzeut, was sicher spannend wär gsi, aber für ds chani leider no chli zweni spanisch 🤷🏽‍♀️ im El Ateneo simer schlussendlech nur ca. 20 minute gsi u zudem het mi Gruppe dert zrugg glah 🥲Dank mire Mitbewohnerin wo mir het gschribe u dr Standort gschickt, hani se de ume gfunde. Chli apisst bini nachdem hei u früeh ga liege. Bi a dem Tag oh nid so guet zwäg gsi.

Witer hei mer die Wuche no e Park erkundet i üser Nachbarschaft miteme See. Ds isch mega gmüetlech gsi dert u mir hei zeme Husufgabe gmacht u ner gläse u musig glost, bevor mer vorem Sunneuntergang wieder hei si.

Am ne Regetag hani de no z Internationale Tangomuseum bsuecht. Das isch grundsätzlich spannend gsi, allerdings het mes i öpe 15 minute gseh u soo viel Infos über Gschicht vom Tango hets oh nid gha. Trotzdem ischs e gmüetleche Nami gsi. Am Abe isch de no öper nöis zur Gastfamilie cho u mini Gastmuetter het us dem Alass selber Empanadas gmacht u Chueche. Wahrschlinlech scho iz mis Highlight vor Wuche 😍Read more